1,619 total reads
Hindi magbabago ang paninindigan ng Simbahang Katolika laban sa sa parusang kamatayan.
Ito ang binigyang diin ng opisyal ng Catholic Bishops’ Conference of the Philippines sa muling pagsusulong ng ilang mga mambabatas na ibalik ang capital punishment sa bansa matapos ang insidente ng pagpaslang ng isang pulis sa mag-ina niyang kapitbahay sa Paniqui, Tarlac.
Ayon kay Rev. Fr. Jerome Secillano-executive Secretary ng CBCP-Permanent Committee on Public Affairs, bagamat may kalayaan ang kongreso na gumawa ng mga batas na para sa bayan ay nananatili naman ang paninindigan ng Simbahan na hindi naaangkop ang muling pagsasabatas ng death penalty.
Paliwanag ng Pari, hindi tugon ang pagbabalik ng parusang kamatayan sa patuloy na karahasan at kriminalidad sa lipunan na isang pagsasawalang bahala sa buhay na kaloob ng Panginoon sa bawat isa.
“Congress has the liberty to enact laws but the church still maintains that death penalty it is not a panacea that will solve criminal acts perpetrated against persons.” Ang bahagi ng pahayag ni Fr. Secillano sa Radio Veritas.
Giit ng pari, mas nararapat tutukan ang pagsasaayos at pagpapabuti sa criminal justice system ng Pilipinas sa halip na ang pagbabalik ng capital punishment.
Pagbabahagi ni Fr. Secillano, kinakailangan ang epektibo at patas na pagpapatupad ng mga umiiral na batas at sistemang pangkatarungan upang matiyak ang kapayapaan at kaayusan sa lipunan.
“It has always been in the government’s agenda, but it would be wise for the government to instead start reforming our criminal justice system which is vital to ensuring peace and order in our society.” Dagdag pa ni Fr. Secillano.
Nauna ng binigyang diin ni Fr. Secillano na hindi death penalty ang naaangkop na tugon sa kriminalidad sa lipunan sa halip ay ang honest law enforcement at incorruptible penal system.
Kabilang rin ang pagbabalik ng death penalty sa mga death laws na tinukoy ni NASSA/Caritas Philippines National Director Kidapawan Bishop Jose Colin Bagaforo sa patuloy na tututulan at lalabanan ng Simbahang Katolika ngayong taong 2021.
