6,392 total reads
Kinundena ng Church People-Workers Solidarity o CWS ang ipapatupad na 85-pesos daily minimum wage hike sa mga manggagawa sa National Capital Region na hinati sa dalawa ang implementasyon.
60-pesos ipapatupad sa July 19, 2026 habang ang dagdag na 25-pesos ay sa January 2027 pa magri-reflect sa payslip ng mga manggagawa.
Ayon kay CWS National Chairman at Caritas Philippines President San Carlos Bishop Gerardo Alminaza, bagama’t positibo ang anumang dagdag-sahod, hindi ito sapat upang matugunan ang patuloy na pagtaas ng presyo ng pagkain, pamasahe, pabahay, edukasyon, serbisyong pangkalusugan, kuryente, at iba pang pangunahing pangangailangan ng mga manggagawa.
Nilinaw ng CWS na malayo ang bagong minimum wage na 780-pesos sa family living wage na 1,300-pesos kada araw sa Metro Manila.
“While any wage adjustment is welcome, this increase falls far short of what workers and their families need to live with dignity. At a time when the cost of food, transportation, housing, education, healthcare, electricity, and other basic necessities continues to rise across the country, this adjustment offers only limited relief. With the estimated family living wage in Metro Manila now exceeding ₱1,300 per day, many workers will continue struggling simply to provide the essentials for their families,” ayon sa mensahe ni Bishop Alminaza na pinadala ng CWS sa Radyo Veritas.
Nanawagan din si Bishop Alminaza sa pamahalaan na magpatupad ng tunay na living wage, ayusin ang mga umiiral na regional wage system, sugpuin ang inflation, korapsyon, at palakasin ang proteksiyon sa karapatan at seguridad sa trabaho ng mga manggagawa.
Binigyang-diin ng grupo ang turo ng Simbahang Katolika na ang makatarungang sahod ay usapin ng dignidad ng tao at katarungang panlipunan.
“A just wage is not merely an economic issue; it is an act of faithful stewardship. A society that values work must also value workers. When labor is honored, human dignity is protected, families flourish, and the common good is strengthened,” bahagi pa ng mensahe ni Bishop Alminaza.
