16,685 total reads
Naglabas ng gabay ang Diyosesis ng Malolos para sa mga layko na kakandidato para sa nalalapit na halalan at mga hakbang upang mapanatili ang paninindigan ng mga parokya na walang kinikilingan sa nalalapit na 2025 National and Local Elections.
Sa inilabas na abiso ng PPCRV – Diocese of Malolos, binigyang diin ng pangunahing tagapagbantay ng Simbahan sa halalan ang paninindigan sa pagsusulong ng aktibong pakikibahagi ng bawat mananampalataya sa kabuuang prosesong pang-demokratiko ng bansa sa pamamagitan ng pakikilahok sa halalan.
“Kaugnay ng darating na Halalan sa Mayo 12, 2025, mahalaga na muling pagtibayin ang paninindigan ng Simbahan na manatiling walang kinikilingan. Bagama’t kinikilala at binibigyang halaga natin ang aktibong pakikibahagi ng ating mga mananampalataya at mga parokya sa mga prosesong demokratiko ng bansa, mahalaga na manatiling hindi pang-pulitika ang paninindigan ng Simbahan. Sa ganitong kaisipan, naglabas ang PPCRV ng Diyosesis ng Malolos ng mga paalala para sa mga sumusunod: Gabay para sa mga Layko na Nagnanais Tumakbo sa Halalan at Mga
Hakbang Upang Mapanatili ang Paninindigang Walang Kinikilingan sa mga Parokya.” Bahagi ng inilabas na gabay ng PPCRV Diocese of Malolos.
Kabilang sa mga inilatag na gabay para sa mga laykong kasapi ng Parish Pastoral Council o Samahang Pang-simbahan na tatakbo sa halalan ang pagsusumite ng liham ng pansamantalang pagliban o pagbibitaw sa tungkuling ginagampanan sa Simbahan.
Maari namang bumalik sa paglilingkod sa Simbahan ang mga hindi papalarin sa halalan ngunit sa pahintulot ng Kura Paroko.
Ang mga maihahalal naman at nagnanais na magpatuloy sa paglilingkod sa Simbahan ay maaring manatili bilang pangkaraniwang kasapi na lamang at hindi bilang opisyal na kinakailangan rin ng pagsang-ayon ng Kura Paroko.
Pinaalalahanan naman ng PPCRV Malolos ang bawat parokya sa paninindigan ng Simbahan na walang kikilingan sa panahon ng halalan kung saan ang lahat ng kasapi ng Parish Pastoral Council at mga Samahang Pang-simbahan ay ipinagbabawal na mag-endorso o sumuporta ng sinumang kandidato o partidong pang-pulitika, gayundin ang tumanggap ng anumang pabor o regalo mula sa sinumang mga tatakbo sa halalan.
Hindi rin maaring pahintulutan ng Simbahan na magamit ang anumang pasilidad o kagamitan sa gawaing may kaugnayan sa pangangampanya kabilang na ang paglalagay ng anumang pampulitikang mga anunsyo na pumapabor sa sinumang kandidato.
Pinag-iingat rin ang lahat ng mga parokya sa paggamit ng mga social media platform upang matiyak na hindi ito magagamit upang maiugnay ang Simbahan sa sinumang kandidato o partido, gayundin ang pagiging sanhi ng pagkakawatak-watak dahil sa pipiliing kandidato maging sa personal man o sa social media.
Ang mga nasabing gabay ay nilagdaan nina Diocese of Malolos PPCRV Diocesan Priest Coordiator Rev. Fr. Lou Salvador Jess de Silva, Diocesan Commission on Social Action Chairman Rev. Fr. Melchor Ignacio at Malolos Bishop Dennis Villarojo noong ika-18 ng Pebrero, 2025.
