Tumatanggap na ang Diyosesis ng Pasig ng mga aplikante upang kumatawan sa diyosesis sa gaganaping World Youth Day 2023.
Magmula ngayong araw August-6, ay tatanggap na ang diyosesis ng mga kabataang aplikante upang mapabilang sa pilgrim delegate.
Inaanyayahan ni Pasig Bishop Mylo Hubert Vergara ang mga kabataan na makipag-ugnayan sa Pasig Diocesan Youth Ministry (PDYM) o sa mini-website ng diyosesis para sa iba pang detalye ng pagpapatala.
“Mga minamahal kong kabataan ng Diyosesis ng Pasig, ipinababatid ko sa inyong lahat na ngayong araw August 6, 2022 ay pormal ko ng binubuksan ang pagtanggap ng mga aplikante bilang pilgrims o delegado ng ating Diyosesis ng Pasig sa darating na World Youth Day 2023 sa Lisbon, Portugal,” ayon sa paanyaya ni Bishop Vergara.
Gaganapin ang Pandaigdigang Pagtitipon ng mga Kabataan sa Lisbon, Portugal mula August 1-6, 2023 na naipagpaliban ng isang taon dahil na rin sa novel coronavirus pandemic.
Taong 1986 ng unang isinagawa ang World Youth Day sa pangunguna ng noo’y Santo Papa na si St. John Paul II bilang pandaigdigang pagtitipon ng mga kabataan layong ipalaganap at patuloy na patatagin ang pananampalataya lalo na sa kabataan.
Naitala naman sa Pilipinas noong 1995 World Youth Day Closing Mass ang World Record na Largest Number of People Gathered for a Single Religious Event na umabot sa 5-milyong katao.
