467 total reads
Binuhay ng isinagawang Caritas Margins Buy and Give Expo 5 ang diwa ng pagbibigayan ng mga Filipino.
Ayon kay Diocese of Cubao Bishop Honesto Ongtioco, magandang pagkakataon ang ginanap na expo upang tupdin ang tunay na mensahe ng kapaskuhan na magbigayan habang tinutulungan ang mga kapwa na naisasantabi at higit na nangangailangan.
“Ating ini-uugnay ang pasko sa pagbibigayan dahil unang nagbigay ang Diyos. Binigay Niya ang Kanyang pinakamahalagang anak sa atin. Sana ganun din ang ating maging attitude, ang mahahalagang bagay na kung minsan ating hinahawakan at ayaw bitiwan doon masusubukan ang ating generosity, reach out to the poor and enrich other people’s lives by our gift-giving,” pagbabahagi ni Bishop Ontioco.
Idinagdag pa ni Bishop Ontioco na ang pagtangkilik sa mga dekalidad na produkto sa Buy and Give Expo ay nangangahulugan din ng pagtulong tungo sa pagpapanibago ng buhay ng mga taong nasa laylayan ng lipunan.
Katuwang ng Caritas Margins ang mahigit sa 70 micro-entrepreneur mula sa iba’t ibang marginalized community sa bansa kung saan habang naipagbibili ang kanilang mga obra ay natutulungan din nito ang nasa 5-libong scholars ng Caritas Manila sa ilalim ng Youth Servant Leadership and Education Program o YSLEP.
Mabibili sa 3-day Buy and Give Expo ang mahigit sa 1000 uri ng mga produkto tulad ng handicrafts, religious items, home decorations, artworks, Baguio organic vegetables at mga piling pagkain na gawa ng partner communities, out-of-school youth at mga bilanggo.
Dumalo sa pagpapasinaya ng benefit project sina dating Finance Secretary at Philippine Veterans Bank Chairman Roberto de Ocampo at Caritas Manila Benefactors Emily Cruz, Hortie Lim at Nena Prieto.
Isinagawa ang ekshibisyon ng livelihood program ng Caritas Manila sa Sunken Activity Center, Glorietta 3, Makati City mula ika-1 hanggang ika-3 ng Disyembre.
