352 total views
Kapanalig, aminin na natin: ang fake news ay nakakabobo. Kaya nga ito na ang pangunahing sandata ng mga halang ang kaluluwa upang malinlang ang marami nating mamamayan. Ang fake news ay nagdudulot ng kaguluhan. Maari rin itong magdulot ng kamatayan. Kaya dapat tayo ay mapag-manman.
Kapanalig ang misinpormasyon at fake news ay delikado, lalo na sa ating bansa. Hindi ba’t noong na red-tag ang mga nagtataguyod ng community pantries, nakatanggap sila ng death threats at rape threats? Nitong nakaraang araw, ang fake news naman ukol sa bakuna ang naglagay sa peligro ng maraming mamamayan- nagkagulo sa mga vaccinations sites dahil may nagkalat naman ng balita na walang bakuna, walang ayuda.
Ang fake news kapanalig, ay mas malawak ang sakop ngayon dahil sa bilis ng pagkalat ng impormasyon dahil sa Internet. Ayon nga sa isang Pulse survey noong 2018, 47% na ang gumagamit ng Internet sa atin, at kadalasan, mobile ang gamit sa pag-access nito. 98% naman ay gumagamit ng Internet para sa social media. Kaka-check natin sa social media, andami nating balitang nasasagap. Kagagamit natin ng mobile phones, may tsismis at your fingertips na.
Alam din naman ng karamihan, mga 88% ng kasama sa survey, na may tsismis o fake news sa social media. 79% din sa kanila ang nagsabi na alam nila na widespread o kalat ang mga fake news sa social media. Kaya lamang, 51% pa rin ang nagsasabi na ang kanilang mga pampulitikang opinyon ay nabago dahil sa fake news. Ano ba ang dapat gawin?
Kapanalig, dahil sa fake news, nagiging bulag ang mga mamamayan sa tunay na nangyayari sa bayan. Ginagawa tayo nitong panatiko ng mga lider na hindi lamang mga institusyon ng lipunan ang sinisira, kundi pati ang ating sense of right and wrong. Ang ating pagkatao na mismo ang nayuyurakan ng fake news—nawawalan na tayo ng dignidad. Kaunting udyok lamang ng balita, sunod-sunuran na tayong nakikipagmurahan sa social media, o nakikipag-tunggalian sa pilahan bago maunahan, o nangungutya sa pagkatao ng kalaban sa pulitika ng ating idolo, kahit wala tayong alam sa katotohanan. Asan na ang ating pagkatao, ang ating kakayahang manuri, ang ating dangal, sa gitna ng fake news?
Kapanalig, ayon sa Fratelli Tutti: “True wisdom demands an encounter with reality.” Kapanalig, lagi nating tanggihan ang fake news. Dapat tayo ay naka-ugat sa katotohan. Bantayan natin ang misinpormasyon; lahat tayo ay maaring mabiktima nito.
Sumainyo ang Katotohanan.