963 total reads
Inilaan ng Diocese of San Pablo sa lalawigan ng Laguna ang buwan ng Agosto bilang Jubilee Month for the Clergy sa diyosesis.
Ayon kay Rev. Fr. Mario Rivera, Director ng Commission for the Clergy ng Diocese of San Pablo, bilang bahagi ng patuloy na lokal na pagdiriwang ng diyosesis ng ika-500 anibersaryo ng pagdating ng pananampalatayang Kristiyano sa Pilipinas ay inilaan ng diyosesis ang buwan ng Agosto upang kilalanin ang mahalagang papel na ginagampanan ng mga Pari sa pagpapalaganap ng Kristyanismo.
Ipinaliwanag ng Pari na isa rin itong pagkakataon upang makilala ng bawat mananampalataya ang mga Pari na naglilingkod sa bayan ng Diyos sa Diyosesis ng San Pablo.
“Ang ating mga Pari ang siyang nangunguna sa pagpapalaganap ng ating pananampalatayang Katoliko kaya naman ang pagpapatuloy ng selebrasyon ng ika-500 taon ng Kristiyanismo, itinalaga po ang buwan ng Agosto bilang Jubilee Month for the Clergy, sama-sama nating kilalaning lubos ang mga Pari na naglilingkod sa bayan ng Diyos dito sa ating Diyosesis ng San Pablo.”pahayag ni Fr. Rivera.
Pagbabahagi ni Fr. Rivera, itatampok sa official Facebook Page ng paggunita ng diyosesis sa ika-500 taon ng Kristiyanismo sa Pilipinas na 500 Years of Christianity – Diocese of San Pablo ang larawan ng Pari, detalye tulad ng araw ng kanilang kapanganakan, lugar na pinanggalingan at araw ng ordinasyon.
Magsisilbi namang rurok ng pagdiriwang ng Jubilee Month for the Clergy ng Diocese of San Pablo ang pagbibigay parangal sa mga magulang ng mga Pari, bilang pagkilala sa kanilang mga sakripisyo na ipagkaloob ang kanilang mga anak upang paglingkuran ang bayan ng Diyos.
“Ang rurok ng pagdiriwang ng Jubilee Month for the Clergy ay bibigyang parangal ang mga magulang ng ating mga Pari upang kilalanin ang kanilang sakripisyo na ibigay ang kanilang mga anak sa Diyos upang paglingkuran ang bayan niya. Ang bawat magulang ay makakatanggap ng certificate mula sa ating diyosesis kasama ang 500 YOC Commemorative Medal.” Dagdag pa ni Fr. Rivera.
Samantala, bilang bahagi ng paggunita ng Jubilee Month for the Clergy sa diyosesis ay inaanyayahan ni San Pablo Bishop Buenaventura Famadico ang bawat mananampalataya sa Diocesan Virtual Concert Series #VocationStories na handog ng mga Pari ng diyosesis na may titulong ‘Konsyerto sa Ikalimang Siglo: Awit Pasasalamat ng Pari ni Kristo’ na masusubaybayan tuwing Sabado sa buong buwan ng Agosto ganap na alas-otso ng gabi na nagsimula noong ika-7 ng Agosto.
Bukod sa talento sa pag-awit ng mga Pari mula sa apat na distrito ng Diyosesis ng San Pablo, tampok rin sa Diocesan Virtual Concert Series ang mga kwento ng buhay at bokasyon ng mga Pari ng diyosesis.
ang lahat ng malilikom na donasyon ay ilalaan naman para health at hospitalization fund ng mga Pari ng Diyosesis ng San Pablo.
“Sa pagpapatuloy po ng ating pagdiriwang ng ika-500 taon ng pagdating ng pananampalatayang Kristiyanismo dito sa ating bansa ang buwan po ng Agosto ay inilaan natin para sa ating mga kaparian, sa kanila pong paglilingkod sa atin na binubuo ng pagpapahayag ng Salita ng Diyos, pagdiriwang ng mga sakramento, pamamalakad ng Simbahan kasama na po yung iba’t ibang programa at ng kawang gawa ay magkakaroon po ng tinatawag na Diocesan Virtual Concert #VocationStories.” paanyaya ni Bishop Famadico.
Una ng inihayag ng Obispo na siya ring outgoing Chairman ng CBCP-Episcopal Commission on the Clergy ang mahalaga ang tungkuling ginagampanan ng mga lingkod ng Simbahan sa pagpapatuloy ng misyon ni Hesus na ibahagi at palaganapin ang Mabuting Balita ng Diyos.
Matatandaang una ng inilaan ng Diyosesis ng San Pablo ang buwan ng Hunyo bilang Jubilee Month for Religious Men and Women sa diyosesis habang noong buwan naman ng Hulyo ay idineklara ang Jubilee Month for the Elderly sa diyosesis.
