Mariing kinundena ng Diyosesis ng Tagbilaran ang pagturing sa mga kababaihan bilang isang bagay sa halip na taong bigyan ng dignidad.
Ito ang pagninilay ni Tagbilaran Bishop Alberto Uy sa kontrobersyal na ‘foam party’ na naganap sa isang pribadong resort sa Panglao, Bohol.
Ayon sa Obispo, hindi makatarungan ang paggamit sa kababaihan na nagbibigay lamang ng aliw sa publiko.
“Doing a foam party with topless women as entertainers is wrong because here women are treated as objects, no longer as subjects or as fellow human beings,” bahagi ng pagninilay ni Bishop Uy.
Ika-5 ng Marso nang maganap ang foam party sa Amanzara Resort kung saan kumakalat ang video footage ng isang babae na walang saplot pang-itaas.
Nagsagawa na ng imbestigasyon ang lokal na pamahalaan ng Panglao sa insidente lalo’t makikita sa video ang siksikan ng mga tao sa resort at hindi nasunod ang safety health protocol na physical distancing at pagsusuot ng face mask at face shield.
Pinagpaliwanag ng L-G-U ang pamunuan ng resort na maaring maharap sa parusa dahil sa paglabag sa ordinansa hinggil sa safety protocol.
Iginiit ni Bishop Uy na hindi makatao ang naturang insidente na tila pambabastos sektor ng kababaihan habang ginugunita ang Womens Month.
“And to do such thing during a time when we are celebrating International Women’s Month, when we are supposed to honor our mothers, sisters, aunties, and nieces, makes it more inhuman, unchristian and reprehensible,” dagdag pa ni Bishop Uy.
Unang sinabi ni Borongan Bishop Crispin Varquez ng Episcopal Office on Women ng Catholic Bishops’ Conference of the Philippines na dapat igalang, bigyang dignidad at palakasin ang sektor ng kababaihan at hindi ituring na isang bagay lamang.
