131,765 total reads
Mga Kapanalig, naaalarma ang ating Department of Health (o DOH) sa pagtaas ng kaso ng mga Pilipinong may human immunodeficiency virus (o HIV), lalo na sa mga nasa edad 15 hanggang 25.
Sa datos ng ahensya, bumulusok nang 500% ang HIV cases sa age group na ito sa pagitan ng 2010 at 2023. Ang pinakabata, ayon kay Health Secretary Teodoro Herbosa, ay isang batang labindalawang taóng gulang. Sa Western Pacific Region, ang Pilipinas daw ang may pinakamaraming bagong kaso ng HIV. Ang ating average nitong unang tatlong buwan ng 2025 ay 57 na kaso bawat araw! Hindi bababa sa limanlibo ang mga kasong naitala ng DOH sa panahong iyon, halos doble ng bilang ng mga HIV cases na nai-record ng ahensya sa kaparehong panahon noong isang taon. Ang mas ikinababahala ng DOH ay ang mga kabataang nahahawahan ng HIV. Kung hindi raw ito maagapan, aabot sa 400,000 ang people living with HIV sa ating bansa. Nais ng DOH na ituring ito bilang isang national health emergency.
Pangunahing nakukuha ang HIV, na nauuwi sa AIDS o acquired immune deficiency syndrome, sa hindi protektadong pakikipagtalilk. Mula nang i-monitor ng Pilipinas ang HIV at AIDS noong 1985, lumilitaw sa datos na 96% ng mga naitalang kaso ay sexual contact ang sanhi. May mga kaso ring naipapasa ito ng isang nanay na may HIV sa kanyang sanggol; ito ang tinatawag na mother-to-child transmission.
Sensitibong paksa pa rin ang HIV at AIDS sa ating bansa. Iniiwasan itong pag-usapan dahil sa negatibong pagtingin sa mga taong nahahawahan. Madalas kasi itong iugnay sa sexual behavior ng mga tao, at aminin nating hindi pa bukás ang kaisipan ng marami sa atin tungkol sa usaping ito. May stigma na kadikit ang pagkakaroon ng HIV. Mababa ang tingin natin sa mga people living with HIV. Kapag pumasok pa sa usapan ang relihiyon, tinitingnan ang mga taong namumuhay nang may HIV bilang mga makasalanang tao. Dapat nating ituwid ito, mga Kapanalig.
Kaya naman, makatulong sana ang panawagan kamakailan ni Bishop Oscar Jaime Florencio, Vice Chairman ng CBCP-Episcopal Commission on Health Care. Hinikayat niya ang mga taong may HIV, lalo na ang mga kabataan, na huwag matakot humingi ng tulong. Huwag silang mahiyang magpasuri para alamin ang kanilang status o kalagayan, lalo na kung sila ay sexually active. Bahagi sila ng Simbahan, pagtitiyak ni Bishop Florencio. “We know that you are part of the Church we serve and love,” wika ng obispo.
National emergency man o hindi ang pagtaas ng mga kaso ng HIV sa ating bansa, katuwang ng ating gobyerno ang Simbahan sa pagharap sa hamong pangkalusugan na ito. Siguradong may mga grupo pa rin sa ating Simbahan ang hindi lubos na natatanggap ang mga taong may HIV at ikinakabit pa rin ang kanilang kalagayan sa pagiging makasalanan. Pero maging bahagi sana tayo ng Simbahang mas nauuna ang pag-ibig at pagmamalasakit kaysa sa panghuhusga at pagsasantabi sa ating kapwa. Sa ganitong paraan, mas maaabután ng akma at sapat na tulong ang mga people living with HIV.
Tungkol naman sa nakaaalarmang pagdami ng kaso ng HIV sa mga kabataan, tandaan nating nagsisimula ang paghubog sa kanilang pagkatao sa ating pamilya. Turuan natin silang igalang ang kanilang kapwa at pangalagaan ang kanilang sarili. Subaybayan natin sila. Maging mabuting halimbawa tayo sa kanila. Ituro natin sa bata ang daang dapat nilang lakaran, paalala nga sa Mga Kawikaan 22:6.
Mga Kapanalig, ibang iba na ang mundo natin ngayon, pero hindi nagbabago ang imbitasyon sa ating mga Katoliko na igalang ang kalayaan ng bawat isa at alagaan ang isa’t isa, kabilang ang mga people living with HIV.
Sumainyo ang katotohanan.
