12,819 total reads
Naniniwala si Taytay, Palawan Bishop Broderick Pabillo na mahalaga ang nalalapit na impeachment trial laban kay Bise Presidente Sara Duterte upang masigurong may pananagutan ang mga opisyal ng pamahalaan, lalo na sa paggamit ng pondo at pagsunod sa kanilang tungkulin.
Ayon sa obispo, ang pagkakaroon ng proseso ng paglilitis ay paraan upang matukoy kung wasto ang paggamit ng pondo ng tanggapan ng Bise Presidente at kung naging maayos ang kanyang pamumuno. Naniniwala ang obispo na ito ay isang mahalagang hakbang para sa transparency at good governance.
“Tapos yan din ang pagpapakita sa atin na ang ating pamahalaan ay talagang seryoso na magkaroon ng transparency. Na mananagot ang mga opisyales,” ayon sa pahayag ni Bishop Pabillo sa panayam ng Radyo Veritas.
Dagdag pa ni Bishop Pabillo, dapat ituring ang impeachment bilang pagkakataon para pakinggan ng taumbayan ang katotohanan tungkol sa mga usaping kinakaharap ng bansa. Saad pa ng obispo, ang proseso ay dapat magsilbing daan para sa paglilinaw kung paano ginamit ang mga pondo at paano isinagawa ang pamumuno ng isang mataas na opisyal.
“Kaya ito ay pagkakataon na mapakinggan ng marami. So ano bang nangyari sa perang binigay sa kanya, sa kanyang fund, at pagkatapos paano siya namamahala, namumuno bilang Bise Presidente. So, for accountability’s sake, makakatulong ‘yan.”
Binigyang-diin din ng obispo ang kahalagahan ng pananagutan ng mga opisyal ng gobyerno, at umaasa siyang magiging maayos ang takbo ng proseso at hindi ito madadala ng pulitika o interes ng ilang grupo.
Nanawagan siya sa mga senador na pairalin ang katotohanan sa kanilang magiging desisyon at umaasa na hindi lamang ito ibabatay sa utos ng kanilang partido o pinuno, kundi sa ikabubuti ng bayan.
Sa kanyang panalangin, hiniling ng obispo na gabayan ng Diyos ang mga lider ng bansa, lalo na sa panahon ng pagsubok, upang manaig ang malasakit, katapatan, at pagkakaisa para sa kapakanan ng sambayanang Pilipino.
Una ng inihayag ni Senate President Francis Escudero ang pormal na pagbubukas ng Senado bilang impeachment court sa June 3.
Noong Pebrero 5, 2025, inaprubahan ng Mababang Kapulungan ang impeachment laban kay Duterte na pinaboran ng 215 mambabatas.
Kabilang sa mga sinasabing kaso laban sa Bise Presidente ay ang Paglabag sa Konstitusyon, Pagtataksil sa tiwala ng publiko, pandarambong at katiwalian at iba pang mabibigat ng krimen.
