766 total reads
August 21, 2020-11:40am
Bibigyang tuon ng Diyosesis ng Kalookan ang paglalaan ng pondo para sa mapatatag ang internet connectivity ng bawat Parokya.
Ayon kay Kalookan Bishop Pablo Virgilio David, ito ay upang magpatuloy ang mga programa ng simbahan sa paghuhubog gayundin ang ilang pang gawain ng bawat Parokya.
Paliwanag ng obispo ang pondo na gagamitin ay mula sa mga hindi natuloy na conferences at seminar dulot na rin ng mga umiiral na quarantine dulot ng pandemya.
“Maari naming i-redirect yung pera dun towards empowering every parish na magakaroon ng strong internet connectivity. Para bawat parokya, bawat bikaryato, bawat commission ng diocese pede sila mag-hold ng teleconferencing by zoom para matuloy ang kanilang mga formation, sa lahat ng business meetings nila. Lahat ng activities nila. So hindi tayo helpless, hindi tayo paralyzed,” ayon kay Bishop David sa programang Pastoral visit on-air ng Barangay Simbayan.
Ang diyosesis ay binubuo ng may 30 parokya na nangangasiwa sa higit sa isang milyong mga katoliko.
Sa kasalukuyang panahon ayon sa obispo ay maraming gamit ang internet hindi lamang para sa live streaming ng Parokya kundi para rin sa mga pagpupulong.
Una na ring inihayag ng obispo ang internet bilang lifeline ng simbahan upang patuloy na maipahayag ang ebanghelyo sa kabila ng pag-iral ng lockdown.
