508 total views
September 17, 2020-1:52pm
Nilinaw ni Manila Apostolic Administrator Bishop Broderick Pabillo na hindi naman ipinagbabawal ang pagbisita ng publiko sa mga sementeryo.
Ayon kay Bishop Pabillo, ang iniiwasan ay ang pagdagsa ng mga tao sa mga puntod dahil sa panganib ng pagkahawa sa novel coronavirus lalu na sa pampublikong lugar.
Panawagan ng obispo na sa mga mananampalataya na ang mahalaga ay alalahanin ang mga namayapa kahit hindi man magtungo sa mga puntod.
“Kahit na hindi kayo makabisita sa sementeryo, tandaan natin na ang mas mahalaga ay ang maalaala yung mga namatay at saka ipagdasal sila,” ayon kay Bishop Pabillo sa Pastoral Visit on-air ng Barangay Simbayanan.
Paliwanag pa ng obispo na ang pag-alaala at pag-aalay ng panalangin para sa mga namayapa ay maaring isagawa sa bawat tahanan gayundin sa ating pagsisimba sa Parokya.
Dagdag pa ni Bishop Pabillo, maari pa rin naman ang pagpupunta sa mga puntod bagama’t dapat itong isasagawa ng sabay-sabay upang maiwasan ang maraming mga tao.
“That can have a solution by coming to the cemetery, not necessarily on November 1 and November 2 so maybe before… or the whole month of November. Ang mahalaga maalala natin sila at ipagdadasal natin sila,” ayon pa kay Bishop Pabillo.
Giit pa ng obispo na maari rin namang isagawa ang pananalangin para sa mga kaluluwa sa bahay bilang pagtiyak sa kalusugan ng bawat miyembro ng pamilya.
Nauna nang humingi ng paumanhin si Manila Mayor Francisco Domagoso sa mamamayan na pansamantalang isasara ang mga sementeryo ng lungsod tulad ng Manila North Cemetery mula sa ika-31 ng Oktubre hanggang ikatlo ng Nobyembre upang maiwasan ang dagsa ng mga tao.
Tinatayang may 16 na sementeryo sa Metro Manila kabilang na dito ang apat na malalaking sementeryo sa lungsod sa Maynila.
