1,064 total reads
Hinamon ni Fr. Lino Gregorio Redoblado, OFM, ang mga mananampalataya na gawing konkretong paraan ng pamumuhay ang mga aral ni San Francisco de Assisi matapos ang pagdiriwang ng ika-800 taon ng Transitus ng tagapagtagtag ng Franciscan Order.
Ayon sa chairperson ng Inter-Franciscan Ministers Conference of the Philippines, hindi dapat masukat sa dami ng mga programa, liturhiya, pagpupulong, pilgrimage at iba pang pagdiriwang ang tagumpay ng Eighth Centenary, kundi sa pagbabagong maidudulot nito sa buhay ng mga tao.
“The real success of the Eighth Centenary will not be measured by how many activities we organized or how many people attended. It will be measured by what happens after the celebration,” ayon kay Fr. Redoblado
Binigyang-diin ni Fr. Redoblado na hindi lamang alaala ang iniwan ni San Francisco sa Simbahan kundi isang paraan ng pamumuhay na dapat ipagpatuloy ng mga mananampalataya.
“Francis did not leave us simply a memory to preserve. He left us a way of life to continue,” aniya.
Hinimok niya ang mga mananampalataya na isabuhay ang tatlong mahalagang pananagutan bilang bunga ng sentenaryo: ang pagsusulong ng kapayapaan, pangangalaga sa sangnilikha, at pakikiisa sa mga mahihirap.
Partikular na nanawagan si Fr. Redoblado na maging tagapagsulong ng kapayapaan ang mga Kristiyano sa lipunang nababalot ng karahasan at iba’t ibang uri ng sigalot at pagkakahati-hati.
“Let us sow peace in our families, communities, Church and society. Let us become an unarmed and disarming presence in a world wounded by conflict and division,” giit ni Fr. Redoblado.
Hinimok din ng pari ang mga mananampalataya na gawing kongkreto ang pangangalaga sa kalikasan, kasabay ng panawagan na manatiling malapit sa mga mahihirap at nasa laylayan ng lipunan.
Binigyang-diin ni Fr. Redoblado na kung ang ika-800 anibersaryo ay magbubunga ng higit na kapayapaan, malasakit sa mahihirap at pangangalaga sa sangnilikha, maituturing na naging makabuluhan ang Project 800.
“If this Eighth Centenary makes us more peaceful, more compassionate toward the poor, and more committed to caring for creation, then we can truly say that Project 800 has borne fruit,” pahayag ng pari
Iginiit ni Fr. Redoblado na nananatiling hamon sa kasalukuyang henerasyon ang panawagan ni San Francisco na mamuhay ayon sa Ebanghelyo.
Dumalo sa National Transitus Celebration na ginanap sa University of Santo Tomas ang may 3,000 mananampalataya mula sa iba’t ibang Franciscan congregations at lay secular order.
