40,762 total reads
Hinikayat ni Cebu Archbishop Alberto Uy ang mga mananampalataya na iwasang ikumpara ang kanilang sarili sa iba at matutong magpasalamat sa sariling mga biyaya.
Sa kanyang pagninilay sa Ebanghelyo, ipinaalala ng arsobispo ang kuwento ng mga manggagawang tinanggap sa magkakaibang oras ngunit tumanggap ng parehong kabayaran sa pagtatapos ng araw.
Ayon kay Archbishop Uy, ipinapakita nito na hindi dapat maging dahilan ng inggit ang biyaya o tagumpay ng ibang tao.
Hinimok din ng Arsobispo ang mga matagal nang kabilang sa Simbahan na tanggapin ang mga bagong nagbabalik sa pananampalataya.
“Sometimes we do the same. We criticize, compare, become jealous, or pull others down, thinking somehow that we will shine more. But putting out another person’s light will never make ours brighter,” ayon pa sa homiliya ni Archbishop Uy.
Dagdag pa ng arsobispo, “So when God blesses your neighbor, rejoice. When someone succeeds, congratulate them. When someone who has been away returns to God, welcome them.”
Paalala ni Archbishop Uy na para sa Panginoon, hindi kailanman huli ang lahat para magsimulang muli sa pagbabalik-loob.
Binigyang-diin din ng arsobispo na kapag pinagpala ang ibang tao, hindi ibig sabihin na nabawasan ang biyayang para sa atin.
“Do not allow somebody else’s blessing to make you forget your own. There is enough grace for everyone. When God blesses another person, He has not taken anything away from you,” ayon pa sa arsobispo.
Sa halip na manghusga, mainggit o manghila pababa, hinikayat ni Archbishop Uy ang mananampalataya na makisaya sa tagumpay ng kapwa, suportahan ang kanilang mabubuting gawain at magpasalamat sa Diyos.
Sa huli, ipinaalala ni Archbishop Uy na sa ubasan ng Diyos, may lugar para sa lahat, may gawain para sa lahat at sapat ang biyaya para sa lahat.
