665 total views
Mga Kapanalig, nakakagulat ang pagdakip ng mga pulis sa senior citizen na si Ma. Salome Ujano, o mas kilala bilang Ate Sally para sa mga grupong nagsusulong ng karapatan ng kababaihan at mga bata. Nataon pa ang paghuli sa kanya sa pagdiriwang ng National Children’s Month.
Inaresto si Ate Sally noong ika-14 ng Nobyembre sa kanyang tahanan sa Malolos City, Bulacan. Ang warrant of arrest ay inilabas noon pang Hunyo ng 2006 o matapos ang mahigit 15 taon. Ayon sa PNP sangkot si Ate Sally sa isang insidente ng pag-ambush sa militar sa probinsya ng Quezon noong 2005. Sa opisyal na pahayag ng Central Luzon Police sa kanilang social media page, tinawag nilang isa sa mga top most wanted persons sa ating bansa si Ate Sally na nagtatago raw sa loob ng 15 taon.
Si Ate Sally ay national coordinator mula pa noong 2008 ng Philippines Against Child Trafficking (o PACT), isang alyansa ng mga NGO sa buong bansa na lumalaban sa trafficking o pambibiktima sa mga bata para sa sapilitang pagtatrabaho at sekswal na pang-aabuso. Mula 1990 hanggang 2007, si Ate Sally ay bahagi ng isa pang NGO na nagtataguyod naman ng karapatan ng mga babaeng naabuso, ang Women’s Crisis Center (o WCC).
Walang batayan ang mga paratang kay Ate Sally sapagkat siya ay nakikipagtrabaho pa nga sa mga pulis. Bilang bahagi ng WCC, siya ay nagsasagawa ng mga pagsasanay sa mga kasapi ng PNP Women and Children Protection Desk upang kanilang maisagawa nang mas mahusay ang pagtupad sa Violence Against Women and their Children Act, ang batas na nagbibigay proteksyon sa mga babae at bata. Bilang bahagi ng WCC, nakakatrabaho rin niya ang PNP Crime Laboratory sa Camp Crame sa pagtanggap sa mga babaeng biktima ng karahasan at panggagahasa upang bigyan sila ng shelter at psychosocial support.
Sa kasalukuyan, kinakatawan si Ate Sally ng PACT sa Civil Society Coalition on the Convention on the Rights of the Child (o CRC Coalition), isang koalisyon ng mga organisasyong nagsusulong ng karapatang pambata sa pamamagitan ng pag-monitor sa mga programa at patakaran ng gobyerno para sa mga bata. Bilang nagsusulong ng karapatang pambata, nagsasagawa ang CRC Coalition ng mga konsultasyon sa mga bata at sa mga iba pang ahensya katulad ng PNP. Kaya masasabi ba talagang nagtatago ang isang taong nangunguna sa pagtataguyod at pagsasanay sa mga taga-gobyerno upang magampanan nila ang kanilang tungkulin sa mga bata at mga babae?
Gaya ng pahayag ng Child Rights Network (o CRN), ang pag-aresto kay Ate Sally ay isang porma ng harassment sa mga nagsusulong ng karapatang pambata. Nagbibigay ito ng mensaheng tila isang krimen ang pagsuporta sa mga komunidad at ahensya upang labanan ang pang-aabuso at karahasan sa mga bata at kababaihan. Maaari itong magtanim ng takot sa mga human rights defenders at mga organisasyong ang tanging layunin ay ipaglaban ang karapatan ng mga bata at kababaihan. Kailangang imbestigahan nang maayos at patas ang kasong isinampa laban kay Ate Sally. Kung kaya itong gawin ng mga pulis sa isang senior citizen na mulat sa kanyang mga karapatan at kaagapay ng gobyerno sa pagpapatupad ng mga batas, paano na lamang sa mga ordinaryong mamamayan?
Mga Kapanalig, gaya ng mababasa sa Mga Kawikaan 29:27, “Ang masasama nama’y sa matuwid nagagalit.” Ngunit hindi galit ang nais nating anihin mula sa paggigiit ng ating mga karapatan. Ang nais natin ay katotohanan. Sabi nga ni Pope Francis sa Catholic social teaching na Fratelli Tutti, “truth… is inseparable companion of justice and mercy.” Sa pag-iral ng katotohanan, mamumulat tayong kakampi ng bawat isa sa atin ang mga nagsusulong ng karapatang pantao katulad ni Ate Sally.
