516 total views
Nakamit ng mamamayan sa Coron, Palawan ang tagumpay laban sa banta ng pagtatayo ng Nickelodeon Theme Park.
Labis na kasiyahan at pasasalamat ang nais ipahatid ng Apostolic Vicariate of Taytay, Palawan dahil sa pag-atras ng Viacom International Media Network sa proyektong labis na sisira sa kalikasan at kabuhayan ng mga residente ng Coron.
Ikinagagalak ni Father Ed Pariño, Social Action Center Director ng Taytay, Palawan na sa unang pagkakataon ay napakinggan ang kahilingan ng mamamayan ng Coron.
Iginiit ng pari na hindi kailangan ng mga lokal na residente lalo na ng mga katutubong Tagbanua ang artipisyal na atraksyon dahil labis-labis na ang kagandahan ng kalikasang biyaya ng Panginoon.
“Ang ganitong uri ng mga proyekto ay hindi naman namin kinakailangan dito, sapat na sa amin at kami ay nasisiyahan na sa natural na ganda ng kalikasan dito sa amin sa Calamianes at sa buong Palawan,” pahayag ni Fr. Pariño sa Radyo Veritas.
Naniniwala ang Pari na kung magpapatuloy ang ipinamalas na determinasyon at pagkakaisa ng sambayanang Filipino ay maipapakita nitong anumang masamang hangarin para sa kalikasan ay makakayanang pigilan.
“Yung ganitong mga hakbangin ay isang bagay na kung saan ay panalo ng mga mamamayan dito sa bahagi ng Palawan, at kapag talagang nagkakaisa ang mga tao anu mang proyekto na sinasabi nating anti-social and anti-development ay hindi talaga matutuloy,” dagdag pa ng Pari.
Partikular namang pinasalamatan ni Fr. Pariño ang Greenpeace Philippines na tumulong sa Simbahan sa pagpapataas ng kamalayan ng mamamayan sa Coron kaugnay sa tunay na bantang kinakaharap ng kalikasan, at ang Radyo Veritas sa pagsisilbi nitong tagapaghatid ng mensahe ng Apostolic Vicariate of Taytay.
“Pinapasalamatan ko po ang iba’t ibang sektor dito po sa Coron, ang mga katutubong Tagbanua, Tourism Office, Local government ng Coron, at pati rin po ang aking mga kasamahan sa Social Action Center, at lalo na po ang Greenpeace na talagang gumabay sa amin para magkaroon kami ng kaalaman at kaliwanagan ukol sa proyektong ito. Lalo na sa Radio Veritas na talagang handang ipasahimpapawid ang aming mga hinaing at kahilingan para po sa kapakanan ng nakararami dito sa Coron,” pagbabahagi ng Pari.
Matatandaang aabot sa 400 hectares ang inisyal na planong tatayuan ng theme park sa nasabing lalawigan.
Naunang naninindigan ang Apostolic Vicariate of Taytay Palawan sa masamang epekto ng proyekto sa kalikasan, kabuhayan at kalusugan ng mga mamamayan.
Read: Underwater Themed Park sa Palawan, kinondena ng Simbahan
Ipinaalala naman ni Pope Francis sa kanyang encyclical na Laudato Si na ang pangangalaga sa kalikasan ay nangangailangan ng isang uri ng pagtanaw sa kinabukasan, sa kung ano ang maaaring maging bunga ng anumang gawain sa susunod na henerasyon.
