8,272 total reads
Nanawagan ang Conference of Major Superiors in the Philippines (CMSP) sa bawat mamamayan na magkaisa para sa iisang adhikain para sa nalalapit na halalan sa bansa.
Ayon sa CMSP, mahalaga ang pagkakaisa ng lahat lalo na ang mga kabataan at mga taong Simbahan upang manindigan bilang tagapaghatid ng pag-asa at tagapangalaga ng katotohanan sa gitna ng patuloy na pagkakahati-hati ng lahat dahil sa paglaganap ng kasinungalingan ng lipunan.
“Sa panahong ang pagkakahati-hati ay lason sa pag-uusap, ang kasinungalingan ay lumalambong sa katotohanan, at ang takot ay sumasakal sa pananampalataya, tinatawag namin ang aming kapwa mamamayan—lalo na ang kabataan at ang mga taong simbahan—na tumindig bilang tagapaghatid ng pag-asa at tagapangalaga ng katotohanan.” Bahagi ng pahayag ng CMSP.
Nanawagan naman ang CMSP sa mga kandidato upang tunay na mamuno at maglingkod ng may integridad, at kababaang-loob para sa kapakanan at kabutihan ng mas nakararami o ng common good.
“Nanawagan kami sa mga kandidato: Huwag ninyong samantalahin ang aming sakit. Huwag ninyong galitin o guluhin ang aming takot. Sa halip, mamuno kayo nang may integridad, kababaang-loob, at puso ng tunay na lingkod.” Dagdag pa ng CMSP.
Partikular ding nanawagan ang CMSP sa iba pang mga komunidad at mga lingkod ng Simbahan na patuloy na mangaral at magsilbing gabay para sa bawat mamamayan lalo sa pagbabahagi ng mga kaalaman kung paano pumili ng karapat-dapat na ihalal para sa nalalapit na halalan.
“Nanawagan kami sa Simbahan at mga komunidad relihiyoso: Mangaral ukol sa katarungan. Turuan ang bayan. Samahan sila. Maging mapagmatyag at propetiko. Gawing pugad ng paninindigan at lakas ang ating mga kapilya at kumbento, mga paaralan at misyon.” Ayon pa sa CMSP.
Una ng umapela ang Conference of Major Superiors in the Philippines (CMSP) na patuloy na ipanalangin ang paggabay ng Panginoon maging mga kandidato at maging sa mga botante para sa pagkakaroon ng kaliwanagan ng isip at paninindigan para sa kapakanan, kabutihan, at kinabukasan ng buong bansa.
Batay sa tala ng COMELEC, aabot sa mahigit 69.6 na milyon ang bilang ng mga rehistradong botante para sa nalalapit na 2025 National and Local Elections habang aabot naman sa mahigit 18,200 ang kinakailangang ihalal na mga bagong opisyal ng bayan.
