2,328 total reads
Tiniyak ng humanitarian, development and advocacy arm ng Catholic Bishops’ Conference of the Philippines ang kagyat na pagtugon sa kalagayan ng mga nangangailangan sa lipunan.
Ito ang bahagi ng mensahe ni Caritas Philippines President, San Carlos Bishop Gerardo Alminaza kaugnay agarang pakikiisa at pagtugon ang Caritas Philippines sa mga pamilyang naapektuhan ng sunog sa Intramuros, Maynila noong ng Pebrero 26, 2026.
Ayon kay Bishop Alminaza, agad na nagpakilos ang Caritas Philippines upang maghatid ng pagkain at pangunahing pangangailangan sa mga naapektuhan pamilya ng naganap na sunog.
Paliwanag ng Obispo, hindi lamang materyal na tulong ang layunin ng kagyat na pagtugon ng Caritas Philippines kundi ang patuloy na pag-alalay sa mga naapektuhang pamilya sa proseso ng kanilang muling pagbangon.
“As families in Intramuros face the aftermath of fire, Caritas Philippines immediately mobilized to provide food and basic assistance. Beyond relief, we offer accompaniment — because rebuilding lives requires more than materials; it requires community.” Bahagi ng pahayag ni Bishop Alminaza.
Binigyang-diin din ni Bishop Alminaza na sa gitna ng sakuna, mahalagang ipadama sa mga nasunugan na hindi sila nag-iisa sa kanilang pagdurusa.
Giit ng Obispo, ang muling pagbangon ng komunidad ay nangangailangan hindi lamang ng tulong-pinansyal o materyal kundi ng pagkakaisa, malasakit, at sama-samang pagkilos ng Simbahan at lipunan para sa mga higit na nangangailangan.
“No one is left alone in their suffering. Disaster exposes vulnerability. Solidarity reveals who we are. From ashes, we rebuild — together.” Dagdag pa ni Bishop Alminaza.
Sa iniyal na ulat, sumiklab ang malawakang sunog noong madaling-araw ng Pebrero 26, 2026 sa isang residential area sa loob ng Intramuros na kilala bilang “Maisan” sa Barangay 655, Intramuros, Maynila, malapit sa Cabildo at Anda Streets.
Tinatayang nasa 300 kabahayan ang naabo at humigit-kumulang 600 pamilya ang nawalan ng tirahan, habang patuloy namang iniimbestigahan ng mga awtoridad ang posibilidad ng arson sa sunog.
