1,597 total reads
Inihayag ng Roman Catholic Diocese of Bangued ang pagkakahalal kay Rev. Fr. Liberato Ortega bilang bagong Diocesan Administrator nito sa panahon ng sede vacante o pagkakabakante ng luklukan ng diyosesis.
Pangangasiwaan ni Fr. Ortega sa kanyang tungkulin ang lokal na Simbahan ng Diyosesis ng Bangued alinsunod sa mga batas at alituntunin ng Simbahang Katolika habang hinihintay ang pagkakahirang ng bagong obispo ng diyosesis.
Hinimok naman ng diyosesis ang mga mananampalataya na ipagdasal si Fr. Ortega upang pagkalooban siya ng Panginoon ng karunungan at paggabay sa pagtupad sa kanyang bagong responsibilidad bilang tagapangasiwa ng diyosesis.
“THE REVEREND FATHER LIBERATO ORTEGA is the new DIOCESAN ADMINISTRATOR of the Diocese of Bangued. The Roman Catholic Diocese of Bangued officially announces the election of Rev. Ortega, as Diocesan Administrator during this period of sede vacante. Let us keep him in our prayers as he leads our local Church in accordance with the sacred canons until a new bishop is appointed.” Bahagi ng anunsyo ng Diyosesis ng Bangued.
Sa panahong wala pang bagong Obispo, mahalaga ang patuloy na pagkakaisa at pananalangin ng mga mananampalataya upang matiyak ang pagpapatuloy ng pastoral na paglilingkod at misyon ng Simbahan sa Diocese of Bangued.
Sa anunsyo ng Vatican noong November 7, 2026 tinanggap ni Pope Leo XIV ang pagbibitiw ni Bishop Leopoldo Jaucian sa pastoral leadership ng Diocese of Bangued sa Abra.
Si Bishop Jaucian, na kasalukuyan ng 66- na taong gulang, ay naitalaga bilang Obispo ng Bangued noong January 5, 2007, at tumanggap ng episcopal ordination noong March 26, 2007 bago pormal na maupo sa tungkulin noong March 31, 2007.
Sa halos 19 na taon niyang pamumuno, naging bahagi rin siya ng Catholic Bishops’ Conference of the Philippines o CBCP, kung saan kasalukuyan siyang chair ng Episcopal Commission on Mission.
Dahil sa kanyang pagbibitiw, pitong ecclesiastical jurisdictions na sa Pilipinas ang bakante, kabilang ang mga diyosesis ng Bangued, Parañaque, Masbate, Kabankalan, Ilagan at Borongan, gayundin ang Apostolic Vicariate of Jolo.
