2,978 total views
Nanawagan si Bishop Paolo Martinelli, OFM Cap., ang Apostolic Vicar ng Apostolic Vicariate Southern Arabia, sa mga mananampalataya na manatiling mahinahon at magkaisa sa panalangin sa gitna ng umiigting na sitwasyon sa Middle East.
Sa kanyang mensahe, iginiit ng obispo ang kahalagahan ng kapanatagan at pagsunod sa mga umiiral na alituntunin ng pamahalaan para sa kaligtasan ng bawat mamamayan.
“I appeal to all of you, dear faithful of the Apostolic Vicariate of Southern Arabia, to remain calm and serene, while at the same time carefully follow all instructions given by our civil authorities,” ayon kay Bishop Martinelli.
Binigyang-diin ng obispo na higit kailanman ay kinakailangan ang pagkakaisa ng mga mananampalataya sa pananalangin para sa kapayapaan.
“Most of all, it is a time for all of us to remain united in prayer for peace,” pahayag pa ng obispo.
Hinikayat ni Bishop Martinelli ang mananampalataya na idulog sa Mahal na Birheng Maria sa pamamagitan ng santo rosaryo ang pag-iral ng pagkakasundo tungo sa mapayapang lipunan.
“I invite you all to pray the rosary every day for peace and reconciliation,” dagdag ni Bishop Martinelli.
Inatasan din ng obispo ang lahat ng parokya na isama sa pagdiriwang ng Banal na Misa ang panalangin para sa kapayapaan at kaligtasan ng mga mamamayan sa rehiyon.
“During all Holy Masses, let us pray for peace and security of all people in this region,” ani pa ng Apostolic Vicar.
Ipinagkatiwala ni Bishop Martinelli sa Panginoon ang kaligtasan ng bawat pamilya at hiniling ang paggabay ng Mahal na Birhen at ng mga banal para sa pagkakaloob ng tunay at pangmatagalang kapayapaan.
Patuloy namang nananawagan ang Simbahan sa mga mananampalataya na maging instrumento ng pagkakaisa, pananalig at pag-asa sa harap ng mga hamon at kaguluhan sa iba’t ibang bahagi ng mundo.
