3,795 total views
Umapela ng panalangin at pakikiisa si Antipolo Bishop Ruperto Santos para sa kapayapaan sa Gitnang Silangan kasunod ng tumitinding sigalot sa rehiyon.
Paalala ni Bishop Santos sa mga Pilipino sa mga apektadong lugar na manatiling mapagmatyag at alerto sa lahat ng oras para sa kanilang kaligtasan.
“For your safety and well-being, I strongly advise you to remain in your respective homes and places of work, to avoid unnecessary travel, and to faithfully follow the instructions of our Embassy officials and all legitimate authorities,” pahayag ni Bishop Santos.
Ang panawagan ng obispo ay kasunod ng ulat hinggil sa malawakang operasyong militar ng Amerika at Israel laban sa Iran na naglalayong pahinain ang kakayahang militar at nuclear ng bansa.
Binigyang-diin ni Bishop Santos na ang patuloy na paglala ng sitwasyon ay may malawak na implikasyon hindi lamang sa rehiyon kundi sa buong mundo.
“This conflict threatens not only the stability of the Middle East but also the peace of the world,” ayon sa obispo.
Nagbabala rin ang obispo sa magiginf epekto ng digmaan sa mga sibilyan.
“Such escalation heightens tensions in an already volatile region and places countless civilian lives at risk,” ani Bishop Santos.
Partikular na tinukoy ng obispo ang kalagayan ng mga Filipino seafarers at migrant workers sa Gitnang Silangan at mga karatig-bansa, at tiniyak ang panalangin ng Simbahan para sa kanilang kaligtasan.
Bukod sa paalala sa kaligtasan, hinimok din ng obispo ang mga mananampalataya na manatiling tapat sa paninindigan para sa kapayapaan.
“As Christians, we are called to be peacemakers… and to stand firm in our commitment to peace, justice, and reconciliation,” dagdag pa ni Bishop Santos.
Hinimok din nito ang publiko na huwag maging manhid sa nangyayaring karahasan sa iba’t ibang bahagi ng mundo.
“Let us not be indifferent. Let us remain vigilant in prayer and steadfast in hope,” panawagan ng obispo.
Umaasa si Bishop Santos na sa pamamagitan ng panalangin at sama-samang pagkilos ay manaig ang pagkakasundo at tuluyang magwakas ang karahasan sa rehiyon.
