276 total views
Muling hinimok ng pamunuan ng St. John the Baptist Church o Minor Basilica of Black Nazarene ang mga mananampalataya na makibahagi sa Traslacion ng Poon na magnilay.
Ayon kay Rev. Fr. Douglas Badong, Parochial Vicar ng Basilica, magandang isipin ng mga lalahok ang pakikiisa na may kaakibat na kapayapaan ng loob at pag-ibig sa kapwa.
Paalala din ng pari, dapat makiisa din maging ang mga panatiko para sa maayos na traslacion.
Pinayuhan din ni Fr. Badong ang mga babae na huwag ng magpumilit na umakyat sa andas upang hindi na masaktan sa halip ay pumila na lamang sa pahalik at huwag ng sumabay sa Traslacion.
“Muli po paalala po sa lahat yung sana po pagnilayan nating mabuti ang tema para sa pagdiriwang ngayon. Yung pag-ibig ang buklod nang pagkakaisa at hinihingan ko po lahat ng deboto, lahat ng mga mamamasan maging po yung mga tinatawag natin na panatiko na maki-isa na po sa kaayusan na ginagawa para sa pag diriwang na ito. Wag na pong ipilit yung mga may sakit ay wag na pong mag pumilit na sumiksik. Puwede naman pong sumama pero dumistansya lang po at lalong lalo na po yung mga kababaihan. Lalo na yung mga kabataang babae na talagang gustong umakyat ng andas e hindi po ito para sa mga katulad po ninyo. Higit po na kailangan kayong ma ingatan, maproteksyunan. Ipaubaya na lang po ito sa mga kalalakihan kasi kong gusto nyo naman po talagang makahawak sa andas o sa imahe ng nazareno e basta pumila lang nang maayos e unlimited time pa po. Puwede nyong halikan, puwede nyong hawakan yung imahe, wag na po doon mismo sa araw nang translacion.
Inaasahan nasa 14 na milyon hanggang 15 milyon ang mga deboto na makikilahok sa Traslacion 2017 na humihingi ng awa, gabay, pagpapala, biyaya at nagpapasalamat sa mga grasyang natanggap.
