6,137 total views
Hinimok ni Antipolo Bishop Ruperto Santos ang mga mananampalataya na tularan ang Mahal na Birheng Maria bilang huwaran ng pananampalataya at daan upang higit na mapalapit sa Panginoong Hesukristo.
Ito ang mensahe ng Obispo sa pagdiriwang ng 20th founding anniversary ng Our Lady of Caysasay – Marikina Chapter na ginanap sa Diocesan Shrine and Parish of Nuestra Señora de los Desamparados sa Marikina City.
Ayon kay Bishop Santos, ang Mahal na Birhen ay patuloy na nagsisilbing patnubay, gabay, at tagapamagitan ng bawat mananampalataya na siyang daan upang higit na makilala,, mahalin at paglingkuran si Hesukristo.
“Ang ating Mahal na Ina ay palaging ating patnubay at gabay, ating huwaran, At sa Kanyang pagkakalinga, pamimintuho, at pamamagitan sa Kanyang anak, tayo ay tiyak na kung saan dadalhin Niya tayo sa tamang landas patungo at pabalik sa Diyos. At sigurado at tiyak na kung saan ang ating panalangin, ang ating dalangin ay makararating sa Diyos, At tiyak at sigurado na ito ay sasagutin. Hindi tayo bibiguin. Ang lahat ng ating ginagawa sa ating Mahal na Ina ay nararapat na magdulot sa atin na higit natin makilala si Jesus, na higit natin siyangs mahalin, at higit natin Siyang paglingkuran”. ayon sa panayam ng Radyo Veritas kay Bishop Santos.
Ipinaalala rin ni Bishop Santos na ang buhay ng mahal na Birhen ay larawan ng ganap na pagsunod sa kalooban ng Diyos kaya nanatili si Maria sa piling ng Panginoon at ng Kanyang Anak hanggang sa wakas.
Binigyang-diin naman ni Our Lady of Caysasay – Marikina Chapter Head Brother Vicente Ragüero na si Hesukristo ang dapat manatiling sentro ng bawat debosyon sa Mahal na Birheng Maria.
Inihayag ni Ragüero na ang patuloy na paglago ng kanilang apostolado ay bunga ng kapangyarihan ng Diyos at ng tapat na pagtitiwala sa Kanya.
Hinikayat naman ni Raguero ang mga mananampalataya na manalangin nang taos-puso, magsisi sa kanilang mga kasalanan, at manatiling matatag sa gitna ng mga pagsubok sa buhay.
Tiniyak ni Raquero na ang mahal na birheng Maria ay laging umaakay sa mga tao patungo kay Hesukristo, alinsunod sa kanyang mensaheng, “I’m always behind my Son. Not me, it’s always my Son.”
