301 total views
Tiniyak ni Cubao Bishop Elias Ayuban Jr. sa mga mananampalatayang naapektuhan ng kasalukuyang kalagayan ng Society of Saint Pius X (SSPX) na nananatili silang bahagi ng Simbahang Katolika kasabay ng panawagan sa pagkakaisa, pag-unawa, at pakikipagkasundo.
Sa kanyang pastoral letter, sinabi ng obispo na bagama’t nasa mahirap na sitwasyong espirituwal ang ilang mga mananampalataya na dumadalo sa mga liturhiya ng SSPX, hindi sila itinatakwil ng Simbahan.
“I want to assure you that in these moments of great spiritual difficulty, you remain part of the Catholic Church and you will always have a place in the local church of Cubao,” ayon kay Bishop Ayuban.
Ipinaliwanag ni Bishop Ayuban ang naging epekto ng kautusan at paliwanag ng Dicastery for the Doctrine of the Faith kaugnay ng SSPX, kung saan binigyang-diin na ang mga obispo at pari ng samahan ang naglagay sa kanilang sarili sa hiwalay na kalagayan mula sa ganap na pakikipagkaisa sa Simbahan.
Kaugnay nito, sinabi niyang iligal ang pagdiriwang ng kanilang mga sakramento, at walang bisa ang mga sakramento ng kumpisal at kasal na kanilang ipinagkakaloob.
Hinimok ng obispo ang mga pari, relihiyoso, at mga layko ng Diocese of Cubao na tanggapin nang may malasakit ang mga mananampalatayang naapektado.
“I urge the clergy and the faithful of the Diocese of Cubao to welcome them with charity, understanding, and patience. Through preaching and catechism, may we avoid condemnation but approach the matter with pastoral tact and sensitivity,” giit ng obispo.
Inihayag din ni Bishop Ayuban na bubuo ang diyosesis ng pangkat ng mga pari at layko na magbibigay ng wastong impormasyon, paggabay, at pastoral na tulong sa mga dating nakikibahagi sa SSPX.
Bukod dito, tiniyak niyang magpapatuloy ang pagdiriwang ng Misa ayon sa 1962 Roman Missal o Traditional Latin Mass sa loob ng diyosesis, at pag-aaralan pa ang pagdaragdag ng mga lugar ng pagdiriwang nito upang higit na mapagsilbihan ang mga deboto, alinsunod sa mga itinakda ng Traditionis Custodes.
Apela ni Bishop Ayuban sa mga mananampalataya na pairalin ang maingat na paggabay, malinaw na pagtuturo ng pananampalataya, at pagkakapatiran habang nananatiling tapat kay Kristo at sa Simbahan. Hinikayat din nito ang mga mananampalataya na ipanalangin si Pope Leo XIV at, higit sa lahat, isulong ang pagkakaisa.
“Let us act with pastoral prudence, doctrinal clarity, and brotherly charity. We renew our fidelity to Christ and the Church and pray for Pope Leo XIV, whom the Lord has set over his flock as shepherd and guardian of the unity of the Church. Most importantly, let us fervently pray for unity.”
