19,148 total reads
Umapela si Military Bishop Oscar Jaime Florencio sa mga driver na maging maingat sa pagmamaneho ng anumang uri ng sasakyan upang maiwasan ang mga sakuna.
Ito ang mensahe ng obispo sa paggunita ng Road Safety Month ngayong Mayo kung saan sunod-sunod din ang mga naitalang vehicular accident na kumitil ng buhay ng maraming indibidwal.
Tinuran ni Bishop Florencio ang summer season kung saan dagsa ang mga tao sa lansangan at iba pang pampublikong lugar kaya’t dapat na maging mapagmatyag sa daan lalo na ang mga driver.
“Gentle reminder lang for our drivers, always take some extra care now that summer is here let’s be more cautious in our driving skills. Prevention is better. Many people are on vacation going to airports, seaports and terminals or even on roads. We don’t want that our excitement for vacation lead us to some horrible scenarios,” pahayag ni Bishop Florencio sa Radio Veritas.
Bukod sa pag-iingat binigyang diin ng obispo ang pananalangin habang nasa daan upang iadya sa mga masasama at anumang uri ng kapahamakan.
“Most of all don’t forget to pray and asking our guardian angels to spare us from these evils,” dagdag ni Bishop Florencio.
Noong May 1 nangyari ang malagim na multi-vehicle collision sa NLEX toll booth sa Tarlac na ikinasawi ng 10 katao kabilang na ang apat na mga bata habang nasugatan naman ang 37 iba pang katao.
Nitong May 4, dalawang katao naman ang nasawi kabilang ang isang limang taong gulang na bata at apat ang napinsala nang mawalan ng kontrol ang driver ng sports utility vehicle (SUV) sa Ninoy Aquino International Airport (NAIA) Terminal 1 sa Paranaque City.
Sa datos ng Department of Health ikinabahala nitong nasa 12, 000 Filipino ang nasasawi kada taon dahil sa road crash kung saan ayon sa Philippine Statistics Authority ito ang ika – 12 dahilan ng pagkamatay sa Pilipinas.
Tema ng Road Safety Month campaign ngayong taon na isinusulong ng Department of Transportation (DOTr) at Land Transportation Office (LTO) ang “Drive to Protect: Safe Streets, Safe Children” na tugma naman sa inisyatibong “Stop Road Crash” ng LTO.
Ang kampanya ay nakabatay sa Philippine Road Safety Action Plan 2023–2028 na inilunsad ng DOTR katuwang ang World Health Organization (WHO) na layong mabawasan ng 35 porsyento ang road traffic death na ayon sa WHO nasa 1.3 milyong katao ang nasasawi sa mundo kada taon dahil sa road crash.
