595 total reads
Mag-aalay ng banal na misa at panalangin para sa mga nasawi sa war on drugs ng Pamahalaan, ang mga grupong Pro-Democracy o ProDem, at Kapatiran at Alyansang Alay sa Kaunlaran ng Bayan mula sa Quezon o KAAKBAY-Quezon.
Sinabi ni Father Warren Puno, Spokesperson ng grupo na layon nitong ipagdasal ang kaluluwa ng mga taong namatay sa giyera kontra droga ng Administrasyon lalo na ang mga inosenteng nadamay lamang at itinuturing na Collateral damages.
Naniniwala ang grupo na ang war on drugs ay isang huwad na labang isinusulong ng pamahalaan dahil tanging mga mahihirap lamang ang namamatay dito habang ang mayayaman na silang tunay na may sala ay malaya at hindi napapanagot sa batas.
Dagdag pa ni Father Puno, bukod sa pananalangin sa kaluluwa at katarungan para sa mga nasawi ay marapat ding ipagdasal ang unti-unting pagpatay ng pamahalaan sa Demokrasya ng bansa.
Aniya, nawawala ang tunay na halaga ng buhay ng mamamayan dahil sa dahan-dahang paniniil ng pamahalaan sa kalayaan at Demokrasya ng bayan.
“Napapanahong ipanalangin natin ang mga kaluluwang humihingi ng katarungan laban sa mapagkunwaring Administrasyong Duterte dahil ang tunay na mukha ng kanilang gawain pala ay hindi lang ang pakunwaring laban sa droga dahil sa ating nakita sa nakalipas na 2 taon ito ay Gyera din laban sa buhay at Demokrasya, dahil walang halaga ang buhay kung walang tunay na Kalayaan at Demokrasya.” pahayag ni Father Puno sa Radyo Veritas.
Kaugnay nitoo, inanyayahan din ng ProDem at KAAKBAY-Quezon ang mga mananampalataya sa iba’t-ibang panig ng bansa na mag-alay pa rin ng panalangin para sa lahat ng mga nasawi.
Ang Banal na misa at panalangin sa mga biktima ng war on drugs ay isinagawa noong ika-31 ng Oktubre ganap na 10:00AM sa National Shrine of Our Lady of Sorrows, Dolores, Quezon, sa pangunguna ni Father Puno.
Batay sa tala ng Philippine Drug Enforcement Agency sa #RealNumbers data ng Pamahalaan, noon lamang buwan ng Agosto ay umabot sa 444 na drug suspects ang nasawi sa anti-illegal drug operation ng mga pulis sa buong bansa na katumbas ng 14 na indibidwal kada araw.
