268 total views
Umabot na sa halos apat na libo ang nagpatala para dumalo sa 4th World Apostolic Congress on Mercy o WACOM4 na gaganapin sa ibat-ibang bahagi ng bansa mula Enero 16-20 ng 2017.
Ayon kay Fr. Prospero Tenorio, secretary-general ng WACOM Asia, kabilang sa mga nagparehistro ang ‘fraternal delegates’ o yung mga namili lamang ng mga lugar na pupuntahan sa halip na dadaluhan ang 5-araw na pagtitipon.
“Ang ating registerd 3,974, kabilang ang kada araw may additional na fraternal delegates, sila yung hindi kaya ng 5 araw na tuloy-tuloy, sila yung namili lamang ng mga lugar na dadalawin.” ayon kay Fr. Tenorio sa panayam ng Radio Veritas.
Kaugnay nito, sinabi ni Fr. Tenorio na hindi maaari ang ‘gatecrasher’ kaya’t mahalagang magpatala ang mga dadalo sa WACOM4 upang magkaroon ng ID na siyang ‘gate pass’ para makadalo sa pagtitipon.
Sa mga nais magpatala, magtungo lamang sa National Shrine of Divine Mercy sa Marilao Bulacan o mag-login sa www.wacom4.com.
“Sa mga gustong humabol, need na magpatala dahil no ID no entry na ipatutupad para sa seguridad at peace and order ng lahat ng mga dadalo. Kailangan nilang magpatala para magkaroon sila ng IDs, sa mga nais magparegister magtungo sa National Shrine ng Divine Mercy, o sa www.wacom4.com.” ayon pa sa pari.
Nasa humigit kumulang 60 Diocese at Archdiocese sa Pilipinas ang makikibahagi kasama ang mga kinatawan mula sa mahigit 40 mga bansa.
Dadalhin ng tinaguriang “Pilgrimage of Mercy” ang mga delegado sa iba’t ibang banal na lugar sa Maynila, Batangas, Bulacan, at Bataan.
Isa sa highlights ng WACOM4 ang pagbisita ng mga delegado sa mga ulila, matatanda, may kapansanan, drug addicts at katutubong Dumagat.
Napili ang Pilipinas na mag-host sa banal na pagtitipon dahil ang mga Filipino saan mang bahagi ng mundo ang nangungunang nagdadala ng pagdedebosyon sa bawat lugar na kanilang puntahan at ito ay napapanahon sa paghahanda na rin sa 500 taon ng Katolisismo sa Pilipinas sa taong 2021 na kailangang malaman ng buong mundo.
