361 total reads
Dismayado si Buhay Partylist Representative Lito Atienza sa naging solusyon ng Duterte administration sa P2,000 pension increase ng mga retiradong miyembro ng Social Security System.
Ayon kay Atienza, salungat ito sa inaprubahang batas ng Mababang Kapulungan ng Kongreso at Senado na dalawang libong dagdag sa pension upang tugunan na rin ang lumalaking gastusin ng mga senior citizens na pensioners nito.
Kulang aniya ang P1,000 lalo’t baka hindi na rin maabutan ng iba ang karagdagan pang P1,000 sa taong 2022.
Kaya’t iminungkahi ng pro – life congressman na i – overhaul ang tanggapan ng SSS at solusyunan ang under collection nito.
“Ang reaksyon ko diyan… dapat general overhauled ng SSS dahil ang problema natin under collection. Kung makokolekta ng maayos ang mga pera ng SSS members palagay ko hindi na kailangan iyan. Iyang postponement ng implementation ng P2,000 increase sa pension. I am disappointed with the solution to the demands of the congress both lower and senate that P2,000 will be given to each retired members,” pahayag ni Atienza sa panayam ng Radyo Veritas.
Nabatid na inaprubahan ni Pangulong Rodgrigo Duterte ang karagdagang increase sa pension para sa mahigit 2 milyong retiradong miyembro ng SSS na popondohan naman ng karagdagang singil sa kontribusyon.
Simula sa Mayo 2017, ang contribution rate ay tataas ng 1.5 hanggang 12.5 porsiyento o katumbas ito ng hanggang P15 hanggang P740 ang itataas sa kontribusyon ng mga miyembro ng SSS.
Binigyan naman ni CBCP Permanent Committee on Public Affairs executive secretary Father Jerome Secillano na hindi sapat ang increase sa kontribusyon ng SSS members para tugunan ang 2-libong pisong pagtaas sa pension ng mga retiradong miyembro.
Read: http://www.veritas846.ph/dagdag-kontribusyon-sa-sss-hindi-sapat-para-sustentuhan-ang-pension-hike/
Nauna ring sinabi ni Lingayen-Dagupan Archbishop Emeritus Oscar Cruz na nararapat pakinabangan ng mga miyembro ng SSS ang kanilang pinag – ipunang pension na sapat sa kanilang buwang gastusin.
