11,041 total views
Inaanyayahan ng CBCP – Episcopal Commission on Prison Pastoral Care (CBCP-ECPPC) ang mamamayan na subaybayan ang pagbabalik ng online program ng kumisyon na may titulong ‘Narito Ako, Kaibigan Mo’.
Ayon kay Military Bishop Oscar Jaime Florencio -chairman ng kumisyon, napapanahon ang muling pagbabalik ng programa sa paggunita ng Jubilee Year of Hope ngayong taon.
Pagbabahagi ng Obispo, sa pamamagitan din ng nasabing programa ay maibabahagi ng Simbahan ang pag-asa na hatid ng Panginoon para sa lahat maging para sa mga Persons Deprived of Liberty (PDLs) na nakagawa ng pagkakasala sa buhay.
“Bilang chairman ng Episcopal Commission on Prison Pastoral Care, ako po ay natutuwa dahil ito po ay nagre-relaunching tayo ng ganitong programa, ito po para sa akin ay nagbibigay sa atin ng pag-asa. Alam niyo po ngayong taong ito Jubilee 2025 ito ay palaging hinihikayat ng Pope Francis yung pag-asa natin mula sa Panginoon hindi po tayo malilinlang. At ito po ay nagbibigay ng pag-asa sa ating mga kapatid, lalong lalo na yung mga kapatid natin sa Persons Deprived of Liberty (PDLs) at ako po ay natutuwa dahil kahit papaano meron tayong maiaambag.” Bahagi ng pahayag ni Bishop Florencio.
Paliwanag ni Bishop Florencio, layunin rin ng nasabing online program ng komisyon na ibahagi ang pag-asa hindi lamang para sa mga PDLs kundi maging para sa kanilang mga pamilya at mga biktima.
Ibinahagi rin ng Obispo na bahagi ng layunin ng programa na maibahagi sa mas nakararami ang mga ginagawa ng prison ministry ng Simbahan at ipaalala sa bawat isa ang pananagutan sa kapwa maging sa mga PDLs na nakagawa ng pagkakasala.
“Dito sa ating munting programang ito ang pananaw ko po ay malaking pag-asa po ang maiiambag natin lalong lalo na sa mga Persons Deprived of Liberty (PDLs) at hindi lang po sa kanila yung ating mga kapatid din kung saan yung mga mahal sa buhay, yung kanilang dependents, yung kanilang families. Ito po ang programa na makapagbibigay sa atin ng siguro hindi lang ngayong taong 2025 ng Jubilee Year ngunit ito ay magbibigay siguro habang panahon na tayo ay nagbobroadcast…” Dagdag pa ni Bishop Florencio.
Pinangungunahan ang talakayan ni Legazpi Bishop Joel Baylon vice chairman ng kumisyon kasama sina Bro. Gerry Bernabe – associate secretary ng prison ministry ng CBCP.
Kabilang sa pangunahing tinatalakay sa nasabing online program ang misyon at tungkuling ginagampanan ng komisyon upang kongkretong maipamalas ang ‘synodality act’ para sa mga Persons Deprived of Liberty (PDLs).
Unang ibinahagi ng Obispo na hindi matatawaran ang adbokasiya at pangarap ng prison ministry ng Simbahang Katolika para sa ikabubuti ng mga PDLs gayundin sa kanilang mga naiwang mahal sa buhay sa labas ng bilangguan.
