Tiniyak ng Catholic Bishops’ Conference of the Philippines–Episcopal Commission on Youth (CBCP-ECY) ang pagsusulong ng mas pinalalim na diwa ng synodality at aktibong pakikilakbay sa kabataang Pilipino sa gaganaping National Conference of Youth Ministers (NCYM) 2026.
Ayon sa komisyon, isasagawa ang NCYM mula August 18 hanggang 22, 2026 sa Diocese of Kidapawan sa Mindanao.
“NCYM 2026 aims to promote and foster the Spirit of Synodality among youth ministers, equipping them to walk alongside Filipino youth,” ayon sa pahayag ng CBCP-ECY.
Iginiit ng komisyon na higit pa sa isang pagtitipon ang NCYM 2026 sapagkat layunin nitong pagtibayin ang ugnayan ng mga diyosesis at palakasin ang kakayahan ng mga youth ministers sa pagtugon sa pangangailangan ng kabataan.
“More than a meeting, NCYM strengthens relationships among dioceses and equips youth ministers to respond more compassionately and effectively to the real needs and hopes of the young people they serve,” dagdag pa ng komisyon.
Ipinaliwanag din ng CBCP-ECY na magsisilbing mahalagang espasyo ang pagpupulong para sa sama-samang paghubog at pakikipagtulungan ng mga lingkod-kabataan mula sa iba’t ibang panig ng bansa.
“It serves as a shared space where diocesan youth directors and official delegates come together not only as coordinators of programs, but as fellow pastoral workers committed to the care and formation of the young,” saad ng komisyon.
Nakaugat ang pagpupulong sa pananaw ng Simbahan para sa kabataan, partikular sa Apostolic Exhortation na Christus Vivit, kung saan layon nitong magbigay ng makabuluhang kapaligiran para sa formation, fellowship, at collaboration.
Sa pamamagitan ng capacity-building sessions, issue-based lectures, at practical workshops, inaasahang mas mapalalalim ang kakayahan at malinaw na direksyon ng mga youth ministers sa kanilang misyon.
Bahagi rin ng inspirasyon ng pagtitipon ang tema ng Jubilee Year 2025 na “Pilgrims of Hope,” na inaasahang maghuhubog sa mga kabataang lingkod bilang mga tagapaghatid ng pag-asa at instrumento ng pagbabago sa lipunan.
Kabilang sa mga layunin ng NCYM 2026 ang pagpapalalim ng pagkakakilanlan ng mga youth ministers bilang mga alagad ni Kristo, paghuhubog sa kanila bilang mga magigiting na saksi ng pananampalataya sa kasalukuyang panahon, at pagpapalakas upang maging mga tagapaghatid ng pag-asa at pagbabago.
Tema ng NCYM 2026 ang “Chosen as Witness! Bearers of Hope” na hango sa Ebanghelyo ni San Juan (Jn 15:27).
Inaanyayahan ng CBCP-ECY ang mga arkidiyosesis, diyosesis, prelatura, bikaryato, at mga kasapi ng Federation of National Youth Organizations (FNYO) na magpadala ng tig-tatlong kinatawan sa pagtitipon.
Para sa karagdagang impormasyon, maaaring makipag-ugnayan sa ECY Secretariat sa 0917-8536792 o sa email na [[email protected]] (mailto:[email protected]). Maaari ring makipag-ugnayan sa Commission on Youth ng Diocese of Kidapawan sa 0947-7633411 o 0960-6460697, o sa email na [[email protected]] (mailto:[email protected]).
