Hinimok ng opisyal ng Catholic Bishops Conference of the Philippines ang Pamahalaan na masusing pag-aralan ang epekto sa mamamayan ng ipinatupad na reporma ng pagbubuwis.
Ayon kay Manila Auxiliary Bishop Broderick Pabillo, Chairman ng CBCP – Episcopal Commission on the Laity, dapat suriin ng Pamahalaan ang Tax Reform for Accelaration and Inclusion (TRAIN) Law 1 kung ano ang idinulot nito sa mamamayan partikular na sa mga mahihirap na sektor.
“Panawagan natin bago pumunta sa TRAIN 2, tingnan muna natin ang epekto ng TRAIN 1 lalo na sa mga mahihirap.” pahayag ni Bishop Pabillo sa Radio Veritas.
Ang panawagan ng Obispo ay sa kabila ng pagsuspende ng Pamahalaan sa pagpapataw ng buwis sa mga produktong langis sa pagpapatupad ng TRAIN Law 2 sa susunod na taon.
Iginiit ni Bishop Pabillo na dapat itama ng kasalukuyang Administrasyon ang mga maling epekto ng TRAN Law 1 tulad ng pagtaas ng presyo ng mga bilihin at serbisyo sa bansa na labis nagpapahirap sa mamamayan.
Sinabi ni Bishop Pabillo na ang dapat hangarin ng Pamahalaan ang ikabubuti ng sambayanan lalo sa mga dukha na kulang sa kakayahang pinansyal upang tustusan ang mga pangunahing pangangailangan ng pamilya.
Bagamat nanindigan ang pamahalaan na ang pagtaas ng presyo ng langis ay dulot ng pabago-bagong presyo nito sa pandaigdigang pamilihan, iginiit naman ng iba’t ibang sektor sa bansa na nakadadagdag ang ipinataw na buwis sa petrolyo sa pagtaas ng presyo ng mga bilihin gaya ng bigas na pangunahing pagkain ng mga Filipino.
Batay sa tala ng Philippine Statistics Authority 12 milyong pamilya ang aminadong naghihirap ito o katumbas ng halos 60 milyong indibidwal.
Una nang tinutulan ng mga lider ng Simbahan ang reporma sa pagbubuwis ng pamahalaan sapagkat malaki ang magiging epekto nito sa mahihirap na mamamayan.
