676 total reads
May 16, 2020-1:35pm
Nanawagan ng panalangin at tulong si Borongan Bishop Crispin Varquez sa mga mananampalataya para sa mga labis na naapektuhan ng bagyong Ambo sa Eastern Samar.
Ayon sa inilabas na video message ni Bishop Varquez, kabilang sa mga napinsala ang kumbento at ang San Ramon Nonato Parish sa Arteche.
“Parang super typhoon na siya, dahil matibay po ang simbahan sa Arteche pero tinanggal po ang whole roofing at yuon pong walling sa altar ay bumaliktad din. ‘Yan po ang nangyari sa simbahan at maraming mga bahay ang nasira doon at sa ibang mga parokya sa northern part sa Diocese ng Borongan,” ayon kay Bishop Varquez.
Bukod simbahan, marami ring mga bahay sa bayan ng Arteche ang labis na napinsala ng bagyo.
Tiniyak naman ni Bishop Varquez ang pakikiisa sa mamamayan na hanggang sa kasalukuyan ay patuloy na natatakot at nangangamba dulot ng kalamidad sa kanilang lalawigan.
Hinikayat din ng obispo ang bawat isa ay manatili ang pagtitiwala sa Panginoon na hindi tayo pababayaan.
“Tandaan po natin na sa gitna ng ating kahirapan hindi po tayo pinababayaan ng Panginoon, ‘yan po ang ating panghahawakan at tayo ay hindi dapat mawalan ng pag-asa. Ang taong may pananampalataya na habang tumitindi ang kapighatian ay lalung tumatatag ang kalooban sapagkat alam natin na hindi tayo pababayaan ng Panginoon,” ayon pa sa Obispo.
Nagpapalasamat naman ang obispo na bagama’t malawak ang pinsala ng bagyong ambo ay wala namang naitalang nasawi bagama’t may isang naiulat na sugatan.
Taong 2013, kabilang din ang Eastern Samar sa labis na naapektuhan ng bagyong Yolanda.
