Lubhang nababahala si Pope Leo XIV sa patuloy na pagdurusa ng mga sibilyan sa gitna ng mga digmaan sa iba’t ibang panig ng mundo.
Sa kanyang Angelus sa St. Peter’s Square sa Vatican, iginiit ng Santo Papa na hindi mananahimik ang simbahan sa mga lumalalang tensyon dahil wala itong maidudulot na kabutihan sa lipunan, sa halip ay nagpapalubha lamang sa kahirapan.
Binigyang-diin ng Santo Papa na ang karahasan at pagkamatay ng mga inosente ay hindi lamang usapin ng isang rehiyon kundi ng buong sangkatauhan.
“We cannot remain silent in the face of the suffering of so many defenseless people who are victims of these conflicts. The death and pain caused by these wars is a scandal for the entire human family and a cry that rises to God,” ayon kay Pope Leo XIV.
Dahil dito, muling nanawagan ang Papa sa lahat ng mananampalataya at mga lider ng mundo na isulong ang kapayapaan.
“I strongly renew my appeal to persevere in prayer, so that hostilities may cease and paths to peace may finally open up, based on sincere dialogue and respect for the dignity of every human person,” apela ng Santo Papa.
Samantala, sa kanyang pagninilay para sa Ikalimang Linggo ng Kuwaresma, pinaalalahanan ng Santo Papa ang mga mananampalataya tungkol sa mas malalim na uhaw ng tao na hindi kayang punan ng materyal na bagay.
“Nothing finite can quench our inner thirst, for we are made for God, and we find no peace until we rest in him,” paalala ni Pope Leo.
Tinuligsa rin ng punong pastol ang pananaw ng makabagong lipunan na nakatuon sa panandaliang kasiyahan.
Hinimok din ni Pope Leo XIV ang lahat na magbalik-loob at iwanan ang makasariling pamumuhay, kasabay ng panawagan ni Hesus na “Come out!” isang paanyaya upang mamuhay sa liwanag ng pag-ibig at pag-asa.
Hiniling ng Santo Papa ang tulong ng Mahal na Birheng Maria upang gabayan ang mga mananampalataya sa mas malalim na pakikiisa kay Kristo lalo na sa nalalapit na paggunita ng Semana Santa at ang Paschal Triduum.
