Nanawagan si Caritas Philippines vice president, San Carlos Bishop Gerardo Alminaza, na manatiling matatag at huwag mawalan ng pag-asa sa kabila ng mga hamong kinahaharap ng mundo at ng bansa.
Ito ang mensahe ng obispo bilang pakikiisa sa pandaidigang pagdiriwang ng Season of Creation 2025 sa temang Peace with Creation: Seeds of Peace and Hope.
Ayon kay Bishop Alminaza, napapanahon ang pagdiriwang ngayong taon dahil hindi lamang ilang buwan kundi maraming taon nang nagaganap ang mga armadong tunggalian sa iba’t ibang bahagi ng mundo.
Bukod dito, patuloy ring dumarami ang mga kontrobersiya hinggil sa katiwalian sa bansa, kabilang ang maling paggamit ng pondong inilaan para sa pagtugon sa climate emergency at mga proyekto tulad ng flood control.
“There’s so much challenge that there’s a small or maybe even big temptation to really lose hope,” mensahe ni Bishop Alminaza.
Dagdag pa ng obispo, bilang Simbahang Katolika, partikular sa Diyosesis ng San Carlos, ipagpapatuloy nila ang pagsisikap na pangalagaan ang kalikasan, hindi lamang para sa sangnilikha kundi para rin sa mga mahihirap na higit na apektado ng pagkasira ng kapaligiran.
Iginiit ni Bishop Alminaza na hindi maaaring magkaroon ng tunay na kapayapaan kapag patuloy na inaabuso ang mga likas-yaman.
“The cry of the common home is very much related to the cry of the poor. Responding to both cries is a good way to establish peace in the world,” ayon sa obispo.
Bilang bahagi ng paggunita sa ika-10 anibersaryo ng Laudato Si’ at pagtugon sa panawagan ni Pope Leo XIV, maglulunsad ang diyosesis, sa pamamagitan ng Lunhaw Integral Ecology Ministry, ng iba’t ibang konkretong hakbang para sa pangangalaga ng kapaligiran.
Kabilang dito ang pagtatanim ng mga puno, community clean-up drive, at mga pagninilay at talakayan hinggil sa pananagutan ng bawat isa bilang katiwala ng sangnilikha.
Hinamon naman ni Bishop Alminaza ang lahat na magkaisa at magsumikap para sa pagbuo ng isang mundong mapayapa, makatarungan, at may malasakit sa kalikasan.
“We encourage everybody, people of goodwill, to join hand in hand in caring for our common home as an expression of our love for God and our love for one another,” panawagan ni Bishop Alminaza.
Ipinagdiriwang ang Season of Creation simula September 1 hanggang October 4, kasabay ng kapistahan ni San Francisco ng Assisi, ang patron ng kalikasan, ngunit pinalawig ito sa Pilipinas hanggang sa ikalawang Linggo ng Oktubre bilang paggunita sa Indigenous People’s Sunday.
