4,726 total views
Hinimok ni Manila Archbishop Jose Cardinal Advincula ang mga mananampalataya na isabuhay ang “ecological conversion” o pagbabagong pangkalikasan sa gitna ng lumalalang krisis sa kalikasan at lumalawak na urban development na patuloy na nakaaapekto sa mahihirap at kalikasan.
Sa kanyang mensahe para sa pagdiriwang ng Laudato Si’ Week, binigyang-diin ni Cardinal Advincula na mas naging makahulugan ang pagdiriwang ngayong taon kasabay ng ika-800 anibersaryo ng Transitus o pagpanaw ni San Francisco ng Assisi, na kilala sa buhay na payak, pagkakapatiran, at pagmamahal sa sangnilikha.
“Eight centuries after his death, the witness of the Poor Man of Assisi remains a prophetic call to recognize creation not as an object to exploit, but as a gift to receive with gratitude and responsibility,” pahayag ni Cardinal Advincula.
Iginiit ng arsobispo na malinaw nang nararanasan sa araw-araw ang epekto ng ecological crisis kabilang ang mabilis na pagkawala ng biodiversity, lumalalang climate emergency, at agresibong urban development na kadalasang isinasagawa kapalit ng kapakanan ng mga mahihirap at nasa laylayan ng lipunan.
Nagbabala rin si Cardinal Advincula sa lumalawak na kawalang-pakialam ng tao sa kalikasan na inilararwan nitong isa sa pinakamalaking panganib na kinakaharap ng lipunan ngayon.
“In the face of this, one of the gravest dangers we face is the growing indifference toward our common home. As the encyclical Laudato Si’ reminds us, many “choose not to change their habits and thus become inconsistent”,” babala ng kardinal.
Binigyang-diin ng kardinal na kinakailangan ang ecological conversion na isinusulong ni Pope Francis sa ensiklikal na Laudato Si’, ngunit sinabi nitong hindi ito madaling maisasakatuparan dahil nangangailangan ito ng tuloy-tuloy na paghuhubog ng isip at puso ng mga mananampalataya.
Kaugnay nito, sinuportahan din ni Cardinal Advincula ang pagpapalawak ng Laudato Si’ Circles sa Archdiocese of Manila sa ilalim ng Archdiocesan Ministry on Integral Ecology bilang maliliit na pamayanan ng panalangin, pagninilay, paghuhubog, at pagkilos para sa pangangalaga sa kalikasan.
“These Circles are tangible expressions of living out the message of Laudato Si’ in everyday Christian life,” ayon kay Cardinal Advincula.
Nanawagan din ang kardinal sa mga mananampalataya na higit na pagnilayan ang sangnilikha ng Diyos upang maisulong ang responsableng pagkilos, tunay na pakikiisa sa mahihirap, at mas matibay na pangangalaga sa kalikasan at kapwa.
