38,009 total reads
Nilinaw ng Sangguniang Laiko ng Pilipinas (LAIKO) na hindi kasali ang mga laykong Katoliko sa nakatakdang rally sa Nobyembre 16 hanggang 18, 2025.
Ayon sa LAIKO, wala silang kinalaman sa anumang panawagan o pagkilos na may kaugnayan sa nasabing pagtitipon. Binigyang-diin ng grupo na mananatili itong tapat sa adhikain ng Simbahang Katolika na isulong ang kapayapaan, pagkakaisa, at pagtalima sa tamang proseso ng katarungan sa lipunan.
“We are NOT part of the rally this November 16 to 18. The Catholic Laity will NOT participate in the said rally, and will NOT join in any call made in said rally,” bahagi ng opisyal na pahayag ng LAIKO.
Kasabay nito, muling ipinaalala ng LAIKO ang mensahe ni CBCP President at Kalookan Bishop Pablo Virgilio Cardinal David noong Nobyembre 5, 2025, na nananawagan ng mapayapang pagkilos, pagkakaisa, at pagtalima sa batas.
Ayon sa mensahe ni Cardinal David, “We must choose the path of non-violence, constitutional order, and peaceful democratic participation. We firmly reject extra-constitutional shortcuts or calls to political adventurism. Our strength as a nation lies in our unity, our love for life, and our resolve to walk the hard path of truth, justice, transparency, and peace, through the democratic institutions we have struggled to build.”
Dagdag pa ng LAIKO, ang tunay na lakas ng bansa ay nakasalalay sa pagmamahalan, katotohanan, katarungan, at kapayapaan, na isinusulong sa ilalim ng demokratikong proseso.
Samantala, nanawagan din ang LAIKO sa lahat ng mananampalatayang Katoliko na manatiling mapayapa, magkaisa sa panalangin, at maging ilaw ng katotohanan sa gitna ng kaguluhan at maling impormasyon na kumakalat sa lipunan.
