6,874 total reads
Mariing iginiit ni Cebu Archbishop Alberto Uy na walang anumang sigalot ang maaaring magbigay-katwiran sa pagwasak ng buhay ng mamamayan at lipunan.
Ito ang mensahe ng arsobispo bilang suporta sa panawagan ni Pope Leo XIV para sa kapayapaan sa gitna ng lumalalang tensyon sa Middle East.
Ayon sa arsobispo, malinaw na paglabag sa international law at sa dignidad ng bawat tao ang mga karahasan.
“No conflict, regardless of its complexity, can ever justify the destruction of civilian life or the targeting of communities and infrastructure,” ayon kay Archbishop Uy.
Muling binigyang-diin ng arsobispo ang buong suporta sa panawagan ni Pope Leo XIV para sa kapayapaan, pagpipigil, at paggalang sa buhay ng tao, lalo na sa harap ng banta ng malawakang pagkawasak.
Iginiit ng arsobispo na ang digmaan ay hindi solusyon sa krisis, subalit nagpapalala lamang ito ng pagkakahati-hati at pagkawasak.
“War does not heal wounds; it deepens them. It does not unite humanity; it divides us further,” ani Archbishop Uy.
Panawagan ni Archbishop Uy sa mga lider ng mundo na piliin ang landas ng dayalogo sa halip na komprontasyon at diplomasya kaysa karahasan.
Hinimok din ng arsobispo ang lahat ng mamamayan na makiisa sa pagtataguyod ng kapayapaan at ipagtanggol ang mga inosente lalo na ang mga bata, matatanda, at maysakit na lubhang naaapektuhan ng digmaan.
“As a Church, we stand in solidarity with all victims of violence, especially our Christian brothers and sisters in regions of conflict who continue to endure fear, displacement, and injustice. In their suffering, we see the suffering of Christ Himself,” giit ni Archbishop Uy.
Sa huli, hinikayat ng arsobispo ang mga mananampalataya na patuloy na manalangin para sa kapayapaan, na nananatiling posible sa tulong ni Hesus na muling nabuhay.
