6,741 total reads
Umapela si Radio Veritas President Fr. Roy Bellen sa mga mamamahayag at content creators na pangalagaan ang katotohanan, kritikal na pag-iisip, at tunay na ugnayan sa gitna ng lumalawak na paggamit ng artificial intelligence sa komunikasyon.
Ito ang binigyang-diin ng pari kasunod ng mensahe ni Pope Leo XIV para sa pagdiriwang ng ika-60 World Day of Social Communications kung saan hinimok ng Santo Papa ang mga tagapaghatid ng impormasyon na pangalagaan ang presensya ng tao at mapanuring pag-iisip laban sa manipulasyon at algorithm-driven content.
“When information can easily be distorted, manipulated, and weaponized for division, Radio Veritas remains committed to being a credible voice that enlightens consciences, promotes truth, and fosters meaningful dialogue,” pahayag ni Fr. Bellen.
Ayon kay Fr. Bellen, mahalagang mapanatili ng media ang pananagutan sa paghahatid ng tama at makabuluhang impormasyon lalo na sa panahong laganap ang misinformation at digital manipulation.
“Communication is about truth, responsibility, and genuine connections. As Church media, we must inform, evangelize, educate, and support people in their search for truth, accurate information, leading to informed political and social participation,” ani Fr. Bellen.
Iginiit din ng pari na patuloy na ginagamit ng Radio Veritas ang iba’t ibang digital platforms kabilang ang digital AM broadcast, television, at online streaming upang maabot ang mas maraming kabataan at mga Pilipino sa iba’t ibang bahagi ng mundo habang isinusulong ang katotohanan at pagkakaisa.
Hinimok din ni Fr. Bellen ang mga communicators, educators, at content creators na paigtingin ang media literacy bilang tugon sa panawagan ng Santo Papa para sa mapagkakatiwalaang tinig sa gitna ng dagsa ng impormasyon sa digital platforms.
“The Holy Father reminded us that we need authenticity to speak for people again,” dagdag ni Bellen. “Radio Veritas will keep using every platform available to ensure that truth, compassion, and the voice of the Church remain present in the digital continent.”
Ang Radio Veritas 846 ay ang pangunahing Catholic radio station sa Pilipinas na nakatuon sa ebanghelisasyon at public service sa pamamagitan ng makatotohanan, balanseng, at makabuluhang pamamahayag.
