18,343 total views
Mariing iginiit ni Antipolo Bishop Ruperto Santos na ang parokya ay hindi dapat ituring na kapangyarihan, pag-aari, o pribilehiyo ng sinuman, maging ng mga pari, kundi isang larangan ng tapat na paglilingkod.
Sa kanyang homiliya sa Misa ng Krisma sa Antipolo Cathedral, binigyang-diin ng obispo ang malinaw na paalala sa mga pari hinggil sa pagtupad ng kanilang misyon sa bawat parokya na kanilang mapupuntahan.
“The parish is not our power. The parish is not our personal property. The parish is not our privilege,” ayon kay Bishop
Santos. Ayon sa obispo, ang pagtatalaga sa parokya ay hindi para sa pansariling interes kundi upang ipagpatuloy ang misyon ni
Kristo sa paglilingkod sa sambayanan. Babala ni Bishop Santos laban sa anumang anyo ng pag-aangkin sa mga simbahan at iginiit na ang parokya ay hindi dapat para sa pansariling kapakinabangan sapagkat ito ay ipinagkatiwala lamang sa pangangalaga at misyong pagpapastol.
“The parish is not our possession. It is not our piggy bank,” giit pa ni Santos. Hiling ng pastol na pagbutihin ang paglilingkod sa mga parokya, kabilang na ang maayos na pagkilos, pananalita, at
pakikitungo sa nasasakupang kawan. Hinimok din ni Bishop Santos ang mga pari na yakapin ang diwa ng pagsunod at kahandaang tumugon sa tawag ng
paglilipat saan mang lugar sila itatalaga. “Kung darating sa atin na tayo rin ay ilipat… atin pong tatanggapin sapagkat iyan ang ating sinumpaan,” saad ni Bishop
Santos.
Ipinaalala ni Bishop Santos na ang misyon ng Simbahan ay hindi pananatili kundi pag-alis upang ipahayag ang Mabuting
Balita.
Tinuligsa rin ng obispo ang labis na pagkiling sa kaginhawaan at pansariling kapakanan sa paglilingkod. “Sa parokya ay pagpapakasakit, hindi pagpapasarap… pagmamalasakit, at hindi pamamasyal,” ayon sa obispo.
Binigyang-diin din ng obispo na ang tunay na yaman ng Simbahan ay hindi materyal kundi espiritwal sapagkat ito ay ang
Panginoong Jesus sa Santisimo Sakramento. Paliwanag pa ng obispo na ang parokya ay mismong sambayanan ng Diyos, ang mga taong bumubuo ng pamayanan.
Panawagan ng obispo sa mga pari at mananampalataya na ituon ang lahat ng gawain hindi sa sarili kundi para sa Diyos at sa kapwa.
