833 total reads
Nanawagan si Presidential Communications Office (PCO) Secretary Jay Ruiz na dapat may pananagutan ang mga nagpapakalat ng fake news, lalo na kung may banta sa pambansang seguridad.
Ito ang naging pahayag ng kalihim sa panayam ng media, kung saan sinabi niyang kung may pananakot at maling impormasyon ay dapat na may mananagot.
“Kapag sumobra na, lalo na kung may pananakot o maling impormasyon, dapat may managot,” ani Ruiz.
Hinimok din ng opisyal ang mga bloggers, influencers, at netizens na maging responsable sa ibinabahagi nilang impormasyon, at hindi dapat gawing kasangkapan ang social media sa paninira o pagpapakalat ng kasinungalingan. “Walang nagre-regulate sa online content, hindi tulad ng TV, radyo, at pelikula. Kaya tuloy, ang daming fake news,” paliwanag ng kalihim.
Nagbigay din si Ruiz ng ng halimbawa ng mga pekeng balitang nakakalito sa publiko, tulad ng maling impormasyon tungkol sa mga suspensyon ng klase.
“Kung sinabi ng gobyerno na walang pasok pero may nagpakalat na meron pala, sino ang paniniwalaan?” tanong niya.
Binanggit din niya ang kaso ng paninira sa mga opisyal at ordinaryong mamamayan na walang magawa upang itama ang kasinungalingan laban sa kanila.
Ayon kay Ruiz, maaaring pag-aralan ang pagkakaroon ng regulasyon o kahit paalala sa mga social media users tungkol sa kanilang pananagutan.
“Hindi pwedeng Wild, Wild West ang online space natin. Dapat may pananagutan ang bawat isa,” ayon pa kay Ruiz. Hinimok niya ang publiko na maging mapanuri sa impormasyong kanilang tinatanggap at ibinabahagi upang labanan ang fake news at mapanatili ang tamang impormasyon sa social media.
Una na ring pinuna ni Pope Francis ang panganib ng fake news, lalo na sa social media at Artificial Intelliegence (AI) na maaaring manipulahin ang isipan ng tao, magpalaganap ng poot, at humina ang tiwala sa lipunan.
Binigyang-diin ng Santo Papa ang kahalagahan ng katotohanan upang mapanatili ang pagkakaisa.
