1,277 total reads
Karagdagang 500 mag-aaral ang bibigyang pagkakataon ng Caritas Philippines-ang social arm ng Catholic Bishops Conference of the Philippines bilang scholars ng Alay para sa Karunungan Scholarship Program Assistance sa susunod na taon.
Ayon kay Kidapawan Bishop Jose Colin Bagaforo, national chairman ng Caritas Philippines/CBCP NASSA, ang programa ay unang inulunsad noong nakalipas na taon kung saan 500 Grade 7 ang nagkaroon ng pagkakataon na mapalago ang kaalaman.
Ipinaliwanag ng obispo na hindi tulad ng karaniwang scholarship para sa mga matatalinong mag-aaral, ang programa ay para sa low academic performers na may 75 grade o mas mababa pa at mula sa mahihirap na pamilya.
“Dahil in our study, nadiscover natin na isa siya sa mga factor kung bakit low performer ang ating mga kabataan sa eskuwela ay dahil kulang ang pagkain, so ‘yun ang ating component, meron tayong tutor na pino-provide tsaka meron tayong pagkain na component, feeding component na pino-provide sa ating napiling 500 na mga scholars from all over the Philippines ito,” ayon kay Bishop Bagaforo.
Ang mga mapipiling scholars mula sa iba’t ibang diyosesis ay tutukan ng mga tutor; P1,000 kada buwang allowance at P300 piso kada araw para sa kanilang pagkain.
Ipinaliwanag ni Bishop Bagaforo na karaniwan sa mga low performing students ay dahil na rin sa kahirapan na kulang sa nutrisyon at wala ding kakayahan sa makabagong teknolohiya tulad ng cellphones at internet.
Inilunsad naman ng Caritas Philippines sa tatlong parokya ng Diocese of Novaliches-bilang pilot project ng simbahan na Alay para sa Karunungan Scholarship Program Assistance.
Ayon kay Bishop Bagaforo, ang community school na nakatuon naman sa TESDA program sa pakikipagtulungan ng Magna Anima Teachers College ni Fr. Tito Caluag.
Dagdag pa ng obispo, “We are starting it now and hopefully ‘pag maging successful tayo dito magandang evaluation natin dito we would like to spread this out in some dioceses also dito sa Pilipinas. So maganda ito focus on vocational training, focus on parang TESDA training in order to provide them immediate employment lalong-lalo na sa mga factories o ‘di kaya sa mga industries natin dito.”
