Hindi na kinakailangan pang isapubliko ng Simbahan ang mga programa at mga gawaing pinangungunahan at sinusuportahan nito para sa mahihirap.
Ayon kay Diocese of Novaliches Bishop Antonio Tobias, hindi naaangkop para sa Simbahan na ipagsigawan ang mga bagay na ginagawa sapagkat maituturing itong kayabangan at pagmamataas.
Paliwanag ng Obispo, mas mabuti ang magtrabaho at magpursige ng tahimik kung saan hindi kinakailangan pang malaman ng lahat ang mga gawain ng Simbahan.
“We cannot trumpet all the things we do, mga ginagawa namin kasi kayabangan lang yan, kayabangan, you know it’s not good to be done, I would rather listen to what is happening in the other place, but I’m not going to say that this is one good thing that we are doing…” pahayag ni Bishop Tobias sa panayam sa Radio Veritas.
Ilan sa mga pangunahing adbokasiya ng Simbahang Katolika bukod sa pagtulong sa mga dukha at nangangailangan, isinusulong din nito restorative justice, disaster preparedness,livelihood programs, paggabay sa mga Overseas Filipino Workers, mga kababaihan, mga matatanda, bata, pagbibigay ng pangalawang pagkakataon para sa mga drug personalities na makapagbagong buhay sa gitna ng pinaigting na kampanya ng pamahalaan laban sa illegal na droga.
Una na ring nanindigan ang Simbahang Katolika na ang pagpapanibago o rehabilitasyon ng isang lulong sa bisyo ang tugon sa malalang problema ng bansa laban sa ilegal na droga.
Ilan sa mga community based drug rehabilitation ng simbahan ay ang Sanlakbay at Kaunting Pahinga ng Archdiocese of Manila; Salubong ng Diocese ng Caloocan; HOPE center ng Diocese ng San Jose, Nueva Ecija; Abot Kamay Alang-alang sa Pagbabago ng Diocese ng Novaliches; Pastoral Approach to Rehabilitation and Reformation ng Diocese ng Cubao; Labang ng Archdiocese of Cebu at ang Galilee Homes ng Diocese ng Malolos.
