Tiniyak ng Caritas Novaliches Social Action Center ang kahandaang tumugon sa pangangailangan ng mga apektadong parokya sa diyosesis dulot ng sama ng panahon dahil sa umiiral na bagyong Dante at bagyong Emong na pinaiigting pa ng hanging Habagat.
Sa isinapublikong abiso ng Caritas Novaliches, Inc. ay inihayag ng Social Action Center ng Diyosesis ng Novaliches ang kahandaan na tumugon at umagapay sa pangangailangan ng mga mamamayang apektado ng sama ng panahon sa nasasakop na lugar ng diyosesis.
Ayon sa Caritas Novaliches, maaring makipag-ugnayan ang mga parokya sa diyosesis para sa pangangailangan ng mga apektadong residente sa kanilang lugar upang agad na matugunan ng Social Action Center ng diyosesis.
“Caritas Novaliches Social Action Center is OPEN and AVAILABLE to provide assistance to parishes within the Diocese of Novaliches during this Habagat season. If your parish needs support, don’t hesitate to reach out!” Bahagi ng abiso ng Caritas Novaliches.
Bukod sa kahandaang agad na tumugon sa mga apektadong mamamayan ay bukas rin ang Caritas Novaliches sa pagtanggap ng mga tulong at donasyon upang maipamahagi sa mga nangangailangan parokya at komunidad.
Bahagi ng panawagan ng Caritas Novaliches sa bawat isa ang tumulong sa mga nangangailangan bilang daluyan ng biyaya at pag-asa para sa mga mamamayang apektado sa sama ng panahon.
“Let’s share our blessings to uplift our parishes and communities affected by the current Southwest Monsoon or Habagat.” panawagan ng Caritas Novaliches.
Bukod sa tulong pinansyal ay maaari ring magbahagi ng in-kind donations sa pamamagitan ng pakikipag-ugnayan sa Caritas Novaliches sa numero bilang 0966-871-1014 o kaya naman ay sa mismong tanggapan nito sa Diocese of Novaliches Social Action Center – 2nd Floor, Obispado de Novaliches, Good Shepherd Cathedral Complex sa Brgy. Fairview, Quezon City.
