17,215 total views
Tiniyak ng Obispo ng Diyosesis ng Virac ang buong pusong pagtugon at pakikiisa ng diyosesis sa panawagan ni Pope Leo XIV na Day of Fasting and Prayer for Peace kasabay ng paggunita ngayong araw ng Feast of the Queenship of Mary-Queen of Peace.
Ayon kay Virac Bishop Louie Occiano, naaangkop ang pag-aalay ng isang araw na pag-aayuno at pananalangin para sa kapayapaan ng mundo sa gitna ng nagpapatuloy na mga sigalot at digmaang nagaganap sa iba’t ibang bahagi ng daigdig.
Pagbabahagi ng Obispo, sa pamamagitan ng mga banal na misa na ipagdiriwang sa buong diyosesis ngayong araw ay kanyang hinihikayat ang mga mananampalataya na magkaisa sa isang simple ngunit malalim na pagkilos ng pakikiramay o ‘act of compassion’ para sa lahat ng mga dumaranas ng pagdurusa dahil sa epekto ng mga armadong sagupaan.
Paanyaya ni Bishop Occiano ang sama-samang pananalangin at pagsusumamo sa Panginoon upang bigyan ng kapayapaan, katarungan at kapanatagan ang lahat ng mga nagdurusa sa iba’t ibang panig ng daigdig.
“Together with the Diocese of Virac, I wholeheartedly stand in solidarity with Pope Leo’s heartfelt appeal for a global day of fasting and prayer today Friday, August 22, the solemn Feast of the Queenship of Mary. At a time when wars continue to ravage the Holy Land, Ukraine, and many other regions, this initiative offers a powerful spiritual response. Within our masses, I enjoin our faithful to unite in a simple yet profound act of compassion — imploring God to bring peace, justice, and consolation to all who suffer.” Bahagi ng pahayag ni Bishop Occiano sa Radyo Veritas.
Bukod sa Diyosesis ng Virac, una na ring ibinahagi ni Caceres Archbishop Rex Andrew Alarcon ang pakikiisa ng Arkidiyosesis ng Caceres sa panawagang ng Santo Papa na pagsasagawa ng isang ‘Araw ng Pag-aayuno at Panalangin para sa Kapayapaan’.
Tiniyak rin ni San Pablo Bishop Marcelino Antonio Maralit Jr. ang aktibong pagtugon ng Diyosesis ng San Pablo sa Laguna sa panawagan ni Pope Leo XIV na sama-samang pananalangin at paghingi ng awa ng Panginoon sa gitna ng nagpapatuloy na sagupaan sa iba’t ibang bansa.
“I definitely support this call of the Holy Father and invite all to join this Day of Fasting and Prayer for Peace.” Mensahe ni Bishop Maralit sa Radyo Veritas.
Naglabas din ng panalangin for peace si Antipolo Bishop Ruperto Santos bilang pakikiisa sa inisyatibo ng Santo Papa upang makamit ang kapayapaan.
Kaugnay nga nito patuloy ang panawagan ni Pope Leo XIV laban sa patuloy na mga sagupaang nagaganap sa daigdig na nagdudulot lamang ng karahasan at pagdurusa sa mga mamamayan.
Ayon sa Santo Papa, walang sinuman ang nagwawagi sa digmaan sa halip ay nagdudulot lamang ito ng malawakang krisis at pagdurusa lalo’t higit sa mga inosenteng sibilyan tulad ng mga kababaihan lalo’t higit sa mga kabataan.
