28,677 total views
Ginawaran ng pagkilala ng National Youth Commission (NYC) ang Parish Youth Ministry ng Saint William the Hermit Cathedral Parish ng Diocese of San Fernando de La Union bilang Outstanding YORP Organization.
Partikular na kinilala ng NYC bilang katangi-tanging Youth Organization Registration Program (YORP) ang programa ng youth ministry ng parokya na “More Than a Ministry: A Holistic Formation for Kalakbays”.
Pinangunahan ni NYC Executive Director and COO Leah Villalon ang paggagawad ng parangal sa Youth Ministry ng Saint William the Hermit Cathedral Parish ng Diocese of San Fernando de La Union noong ika-31 ng Enero, 2024 kung saan inihayag ng opisyal ang pagkilala sa dedikasyon at pagsusumikap ng organisasyon na magabayan ang kapwa nila kabataan sa tamang landas.
“We are truly inspired by the work that your organization is doing and we [the NYC] should be thanking you for your efforts,” Ang bahagi ng mensahe ni NYC Executive Director Leah Villalon.
Nakapaloob sa “More Than a Ministry: A Holistic Formation for Kalakbays” ang comprehensive youth formation program ng parokya na nakatuon sa spirituality, leadership, skills development, at social responsibility ng mga kabataan na naglalayong gabayan ang mga kabataan sa pagiging mas aktibo at kapakipakinabang na kasapi hindi lamang ng Simbahan kundi ng mismong lipunan.
Ang Outstanding YORP Organization Awards ng National Youth Organization ay isang pagkilala na iginagawad ng komisyon para sa mga kahanga-hangang YORP-registered youth organizations sa buong bansa.
