11,381 total reads
Nanawagan ang Caritas Philippines na ipagpaliban ang plebisito kaugnay ng panukalang Conditional Joint Venture Agreement ng South Cotabato II Electric Cooperative o SOCOTECO II at Ignite Power kung hindi pa natitiyak ang malaya, may sapat na kaalaman, kapani-paniwala at mapagkakatiwalaang pagdedesisyon ng mga member-consumers-owners.
Sa mensahe ng pakikiisa sa Diocese of Marbel na pinamumunuan ni Bishop Cerilo Casicas, sinabi ni Bishop Gerardo Alminaza, Pangulo ng Caritas Philippines at Interim Chairperson ng Integral Ecology Ministry, na hindi dapat ituring na simpleng komersyal na produkto ang kuryente.
“Electricity touches almost every aspect of daily life. It lights homes, enables children to study, sustains hospitals and workplaces, and supports families’ livelihoods. It is not merely a commercial commodity; it is an essential public service,” pahayag ni Bishop Alminaza.
Binigyang-diin ng obispo na ang mga pasyang may kinalaman sa pagmamay-ari, pamamahala, operasyon, halaga, at pangmatagalang direksiyon ng serbisyo ng kuryente ay dapat na katuwang ang mga mamamayan, sa halip na isantabi ang kanilang karapatan.
Ayon sa Caritas Philippines, hindi sapat ang simpleng pagpapalabas ng kasunduan at pagdaraos ng information sessions upang masabing tunay na nakilahok ang mga member consumers.
“Disclosure alone is not the same as informed participation,” giit ni Bishop Alminaza.
Binigyang-diin ng obispo na kailangang mabigyan ang mga member consumers ng malinaw at tapat na paliwanag, malayang pagsusuri, kapani-paniwalang tugon sa kanilang mga tanong, at sapat na panahon upang suriin ang pangmatagalang epekto ng kasunduan sa singil sa kuryente, mga manggagawa, pamamahala at kinabukasan ng kooperatiba.
Binigyang-diin din ng Caritas Philippines ang kahalagahan ng independent oversight sa pangangasiwa ng plebisito, lalo na’t ang pamunuan ng kooperatiba ay may papel sa pangangasiwa, canvassing at pagpapahayag ng resulta.
“Openness, impartiality, and credible independent oversight are indispensable,” ayon sa pahayag.
Nilinaw naman ng Simbahan na hindi nito layuning diktahan ang boto ng mamamayan.
“The Church does not seek to decide for the people or dictate how they should vote,” paglilinaw ni Bishop Alminaza.
Sa halip, sinabi nito na tungkulin ng Simbahan na makilakbay sa mamamayan, hubugin ang konsensiya, ipagtanggol ang dignidad ng bawat isa, at pangalagaan ang demokratikong espasyo upang makapagpasya sila batay sa napatunayang katotohanan at sa kabutihang panlahat.
Apela ng Caritas Philippines sa mga lider ng kooperatiba, mga opisyal ng gobyerno, Ignite Power, civil society, mga pamayanang pangsimbahan, at mga member-consumers na pairalin ang katapatan, paggalang, at pagtanggol sa kapakanan ng nakararami.
“Let us seek verified facts; reject misinformation, inducements, intimidation, trolling, and personal attacks,” panawagan ni Bishop Alminaza.
Ang SOCOTECO II ang kasalukuyang nagsusuplay ng kuryente sa General Santos City, Sarangani, at iba pang bahagi ng South Cotabato.
