405 total views
Nararapat na tingnan sa positibong pananaw ang muling pagpapaliban sa nakatakdang Barangay at Sangguniang Kabataan Elections.
Ito ang apela ni Rev. Fr. Conegundo Garganta – Executive Secretary ng CBCP-Episcopal Commission on Youth kaugnay sa opisyal na pagpapaliban sa Barangay at SK Elections sa ilalim ng Republic Act No. 10952 na nilagdaan ni Pangulong Rodrigo Roa Duterte noong ika-2 ng Oktubre.
Ayon sa Pari, dapat na tanggapin at ituring na isang opurtunidad ang muling pagpapaliban sa halalang pambarangay upang mas maayos na mapaghandaan ito partikular na ang SK Elections para sa susunod na taon.
“Sana po itong pormal at opisyal na pasya tungkol sa pagpapaliban ukol dito (sa Barangay at Sangguniang Kabataan Elections) sana po ay matanggap ng mga taong may bahagi o gampanin na ito bahagi o paraan ng pagsisikap na isaayos ang katayuan o kalagayan ng SK Election at lahat ng may mga kaugnayan sa paghahanda”. pahayag ni Fr Garganta sa panayam sa Radio Veritas.
Kaugnay nga nito mula ng maipasa ang Anti-Dynasty Probation bilang bahagi ng SK Reform Law noong 2016 ay hindi pa ito tuluyang naipatutupad dahil sa dalawang beses na pagpapaliban sa halalang pambarangay.
Nasasaad sa bagong SK Reform Law na maaari lamang tumakbo para sa katungkulan ay ang mga may edad 18 hanggang 24-taong gulang kung saan bahagi ng Certificate of Candidacy na lalagdaan partikular ng mga SK candidates ang pagtiyak na wala silang kamag-anak sa mga halal na opisyal na maaaring maging batayan ng posibleng diskwalipikasyon.
Matatandaang una nang binigyang diin ng Kanyang Kabanalan Francisco sa isinagawang World Youth Day sa Krakow, Poland na sa tulong ng katapangan, kakayahan at kaalamang taglay ng mga kabataan ay mas mabibigyang pag-asa ang kasalukuyang lagay ng lipunan.
