34,655 total reads
Naniniwala si dating Presidential Political Affairs Adviser at political analyst Ronald Llamas na mahalaga ang naging pag-amin ni Davao City Mayor Sebastian “Baste” Duterte na nagkaroon ng mga transaksyon ang GenCorp sa Davao City government.
Sa panayam ng programang Veritas Pilipinas, tinalakay ni Llamas na mahalaga ang naging talakayan sa nakaraang Impeachment Trial kung saan naging sentro ng pagdinig ni Vice President Sara Duterte ang testimonya ni Davao Mayor Baste Duterte kaugnay ng mga kontrata ng Davao City government sa GenCorp Industries Inc., na kumpanyang idineklara ng Bise Presidente bilang isa sa kanyang business interests sa kanyang 2024 at 2025 SALNs.
Idineklara ng Senate Impeachment Court si Mayor Baste Duterte bilang hostile witness, na nagbigay-daan sa prosecution na magtanong sa kanya gamit ang leading questions.
“Inamin ni Baste na nakikinabang ‘yung GenCorp sa mga kontrata ng City Hall sa Davao. Ang sabi lang niya, hindi niya alam na ‘yung kanyang kapatid ay major stockholder doon sa company na ‘yon.” Bahagi ng pahayag ni Llamas sa Radyo Veritas.
Ayon sa mga ulat kaugnay sa naganap na pagdinig, kinumpirma ni Mayor Baste Duterte na nagkaroon ng 19 contracts sa pagitan ng Davao City government at GenCorp, na nagkakahalaga ng mahigit ₱33 milyon, kung saan sinabi rin ng alkalde na hindi niya personal na sinuri ang lahat ng kontrata at corporate records ng kompanya.
Gayunman, iginiit ng alkalde na kung alam niyang may business interest ang kanyang kapatid sa GenCorp, hindi niya pahihintulutan ang mga kontratang ito.
“Well, kahit i-assume natin na hindi niya alam, ‘di ba, ‘yung mga dokumentong pinapapirmahan niya, pero dapat bago niya pirmahan ay may due diligence na ang mga tao niya.” Dagdag pa ni Llamas.
Ayon kay Llamas, sinabi rin ni Mayor Baste Duterte sa pagdinig na nananatili sa kanya ang accountability bilang head of the procuring entity ng lungsod kahit may mga kinatawang awtorisadong pumirma sa ilang dokumento.
Para kay Llamas, mahalagang usapin dito ang conflict of interest, lalo na dahil pampublikong pondo ang sangkot sa mga government contracts.
“Kung may conflict of interest, ‘no, eh sigurado na nagagamit mo ang pera ng bansa para makinabang kayo—kayo, mga magkakaibigan, magkaka-mag-anak. Kaya bawal na bawal ‘yan sa ating mga batas.” Ayon pa kay Llamas.
Samantala, patuloy namang tinatalakay ng impeachment court ang mga alegasyon kaugnay ng unexplained wealth at business interests ng Bise Presidente, kung saan una ng iginiit ng depensa na walang direktang pakikialam si VP Sara sa mga kontrata ng Davao City government.
Kasunod ng naging pagharap ni Mayor Baste Duterte noong September 29, 2026 sa Senado ay nagpatupad naman ang Senate Impeachment Court ng isang procedural pause nitong September 30, 2026 at inaasahang ipagpapatuloy ang paglilitis sa October 1, 2026.
