264 total views
“Dinggin ang pananangis ng mundo at ng maralita.” Ito ay mga kataga mula sa kay Pope Francis sa Laudato Si. Ang mga salitang ito ay angkop na angkop sa ating sitwasyon ngayon. Ang buong mundo ay nasa gitna ng krisis sa enerhiya at mas malawig na kahirapan.
Ang global energy landscape ay lubhang naapektuhan ng tuloy-tuloy na pag giyera ng Russia sa Ukraine. Dahil dito, tumataas ang presyo ng langis sa buong mundo habang nagkukulang ang suplay nito sa iba ibang bansa.
Sa bilis ng pagtaas ng presyo ng langis, maski ang mga malalaki at mayayamang bansa ay umaaray. Ang mga maliliit at developing countries gaya ng Pilipinas, pihadong mas hirap. Nakikita at nadarama na natin hindi lamang ang mabilis na pagtaas na presyo ng krudo, kundi pati na rin ang mabilis na pagtaas ng presyo ng mga bilihin.
Ang umiiral na energy crisis ay bunsod na rin ng ating patuloy na malawakang paggamit at pagtangkilik sa langis. May mga pag-aaral na nagsasabi na 80% ng enerhiya na ginagamit sa buong mundo ay mula sa fossil fuels. Hindi lingid sa kaalaman ng marami na ang langis na ito ay nagdudulot ng emisyon na nagpapainit ng mundo. Ang langis, mahal na nga, ay sumisira pa ng ating kapaligiran, at kalaunan, ay lalason din sa sangkatauhan. Sa ating bansa, langis din ang isa sa pangunahing sources of energy.
Kapanalig, panahon na mismo ang nag-uudyok sa atin na tumingin na sa iba pang sources o pagkukuhanan ng enerhiya. Ang langis sa buong mundo ay nagiging sanhi ng malawakang pagkasira ng ating kapaligiran. Sa halip na maging mitsa ng kaunlaran, ngayon nagiging mitsa na ito ng kahirapan at kaguluhan sa buong mundo. Kailangan na natin, kahit paunti-unti, bawasan ang ating pag-asa o dependency sa langis.
Magagawa ito, maski rito sa ating bansa, sa pamamagitan ng pagdagdag ng ating pamumuhunan o investment sa paglinang ng renewable sources of energy. Isa na rito ay ang tubig, isang resource na pumapalibot sa ating bansa. Panahon na upang pag-aralan ito ng masinsinan sa ating bayan. May mga mini hydropower plants sa ating bayan na may potensyal na ma-rehabilitate at gawing mas efficient —maari dito muna magsimula ang mas masigasig na pamumuhunan para sa renewable energy.
Isa lamang ito sa mga maaaring gawin ng bayan upang mabawasan na, kahit paunti-unti, ang ating over-dependence sa langis bilang energy source. Ang ating pagkilos tungo sa mas makaka-kalikasang enerhiya ay hindi lamang magpapababa ng presyo ng elektrisidad, sinisiguro din natin dito ang kinabukasan ng lahat, mayaman man o mahirap.
Sumainyo ang Katotohanan.