Hinimok ng kinatawan ni Pope Francis sa Pilipinas ang mananampalataya na tularan ang mga gawi ni Venerable Teofilo Camomot.
Ayon kay Papal Nuncio to the Philippines Archbishop Charles Brown, maganda ang mga halimbawang iniwan ng dating arsobispo lalo na ang pagmalasakit sa mga mahihirap at pagtataguyod sa misyon ni Hesus bilang lingkod ng simbahan.
“His [Venerable Teofilo Camomot] tremendous love for the poor, his deep spritiuality, for his amazing life of prayer, he is a figure that all of us can imitate especially priests and bishops, imitation of being a good shepherd,” mensahe ni Archbishop Brown.
Ang mensahe ng nuncio ay kasabay ng isinagawang thanksgiving and promulgation ng decree sa heroic virtues ang unang hakbang upang ganap na maging banal si Venerable Teofilo.
Pinangunahan ni Archbishop Brown ang pagdiriwang na inilarawang kahanga-hanga ang mga kuwento sa katangian ng namayapang arsobispo lalo na sa paglilingkod sa pamayanan.
Sa homiliya ni Cagayan De Oro Archbishop Jose Cabantan, pinuri ang pagiging payak ni Venerable Teofilo at malalim na pagmamahal sa Panginoon at sa kawang ipinagkatiwala sa kanyang pangangalaga.
“Archbishop Camomot was a loving and caring pastor. He often visited home of his parishioners, and got in touch with their lives, especially of the poor. He was humble as a person, and practiced self-denial, coupled with his steadfastness in prayer. He lived simply,” ani Archbishop Cabantan.
Ikatlo ng Mayo ng aprubahan ni Pope Francis ang decree sa heroic virtues ni Venerable Teofilo.
Dumalo sa pagtitipon sa Daughters of St. Teresa sa Cebu ang daan-daang deboto ni Venerable Teofilo gayundin ang mga pari at obispo mula sa mga karatig lalawigan lalo na sa Archdiocese of Jaro at Archdiocese of Cagayan De Oro na pinaglingkuran ni Venerable Camomot noong nabubuhay pa.
September 1988 nang nasawi sa vehicular accident ang arsobispo at binuksan ang proseso sa pagiging banal noong 2010 sa pangunguna ni noo’y Cebu Archbishop Ricardo Cardinal Vidal.
Sa kasalukuyan sinimulan na rin ang imbestigasyon ng mga Catholic Doctors para sa isang himala na kinakailangan para sa beatipikasyon ni Venerable Teofilo Camomot.
